Herriko zaindaria ere berpizteko adina ekitaldi, 24 orduz

Eguerdiko 12:00etan pun­tuan, kanpai hotsen atzetik egin zuten oihu Hernaniko Arraun Elkarteko eta Kantuz abesbatzako kideek: «Gora San Joan! Gora Hernani!». Eta lehertu zen festa, aurreneko etxaferoekin batera.
Larunbatera bitartean, ez du etenik izango festa giro horrek, eta gaur bertan, denetik izango da, goizean goizetik.

San Joan eguneko dianak, kontzertuak eta meza
Goizeko 09:00etan hasiko dira Mendirik Mendi doinua­rekin herritarrak esnatzen, Hernaniko txistulariak eta Musika Banda. San Joanen ohorezko meza nagusia ere gaur izango da, parrokian, 11:00etan.
Ondoren, musikak hartu­ko du berriro protagonismoa. Goizeko 11:30etan Santa Bar­ba­ra eta Etxeberri elkar­teetako gazteen danborradak girotuko ditu kaleak, atzoko helduen danborradari testigu hartuta.
Eguerdiko 12:00etan, be­rriz, txistularien kontzertua izan­go da arkupetan. Aurten­goa, 36garren edizioa izango da. 1980an eman zuten au­rre­neko kontzertua orduko 6 txis­tularik. Gaur egun, berriz, ge­ro eta partehartzaile gehia­go izaten dira: ‘Hernani’ Mu­sika Eskolako eta inguruko herrietako txistulariak ere aritzen baitira. Aurten, 36 izango dira, eta gainera, metal boskotea eta bi ba­karlari izango dituzte la­gun: Naroa Jaka abeslaria eta Idoia Ansorena txistularia.
Txistulariei Musika Ban­dak hartuko die erreleboa, 13:15etan. San Joan eguneko kontzertu berezia emango dute arkupetan, eta taldeko bi kide ere omenduko dituzte; Raul Garcia, bandan 25 urte egin dituena, eta Damaso Usabiaga, 50garren urte honetan bandari agur esango diona.

Dantza, kontzertuak eta karaokeak, arratsaldean
Bazkalondorenean, beste ha­maika ekitaldi izango dira. Arra­tsaldeko 17:00etan hau­rren­tzako antzerki musikala izango da Atsgeindegin: ‘Sar­dina freskua’. Arratsaldeko 18:00etan, berriz, dantza suelto txapelketa izango da plazan, Kriskitiña dantza taldearen eskutik. Aurten, 14 bikotek hartuko dute parte.
Dantza saioaz gain, arra­tsaldeko 18:00etan bertsolari eta trobadoreen topaketa ere egingo da Biteri kultur etxe­an, Amherrek anto­la­tu­ta. Hain zuzen, Eli Pagola, Unai Agirre eta Fredi Paia ariko dira bertsotan, eta Kanarie­ta­ko Yeray Rodriguez eta Ko­lon­­biako Edwin Giraldo, tro­ba­dore lanetan. Ikusmiran egon beharrean, akzioa na­hi­a­­go dutenek, berriz, beste bi au­ke­ra izango dituzte arra­tsal­de­an. Batetik, 19:30etan dan­tza ikusteko ez; dantza egi­te­ko aukera izango da Urbieta kalean, aerorrun­ba­ren errit­mora. Bestetik, arratsaldeko 17:00etan hasita, EITBk Kan-tu Giro karaokea grabatuko du Zinkoenean, parte hartu nahi duten herritar guz­tie­kin. Eta hau ez da eguneko kara­oke bakarra izango. Gaue­ko 22:00etan, Bilgune Feminis­taren txosnan ere izango da kanturako tartea.

Gauean ere, musika nagusi
Festak aurrera egingo du gau osoan zehar ere.
Gaueko 22:00etan, herriko taldeek kontzertua emango dute Molotoff irratiaren agertokian, txosnetan; Bh roja, Meldtown, Dirty eyes eta Coyotito mamimo tequila cactus. Eta Gazte Asanbla­da­ren txosnan 80eko hamar­kadako play backa egingo da 00:00etan.
Gaueko 23:00etan, berriz, Ingo al de taldearekin dan­tzaldia izango da Atse­gin­de­gin, eta 23:15etan Xalaparta txaranga hasiko da kaleak alaitzen. Zezen suz­koa ere dan­tzara aterako da 23:30e­tan, eta gau osoan zehar, dul­tzaineroak ariko dira. Larrain dantza ere izango da, 00:00e­tan Plaza Berrin.