Azken bi urteetan izan duen harrera ona ikusita, aurten ere txosna jartzea erabaki du Dobera-Kronikak. Gosari goxo-goxoak izango dira ordu txikitan: tortilla edo txorixo pintxoak, bizkotxoak, edari frexkoak, kafea, txokolatea... Eta baita San Blas opila ere.
San Blas opila edo ‘Caprichos del desierto’
Lehenengo urtean sekulako “arrakasta” izan zuen San Blas opilak, “Caprichos del desierto” izenez ere ezagun egin zen opilak. Iaz ez zen aukeran izan txosnan, baina oraingo honetan bueltan izango da. Eta orduko hartan probatu ez zutenek, oraingoan izango dute aukera.
Goizero, zabalik
San Joanek iraun bitartean, egunero izango da bertan gosaltzeko aukera, ekainaren 24tik 27ra. Gainera, aurten, aurreko urteetan baino ordubete lehenago irekiko ditu ateak txosnak. Hain zuzen, goizeko 04:00etatik aurrera egongo da zabalik.
Lehiaketa ere bai
Saltsa sortzeko, lehiaketa ere antolatu du Dobera-Kronikak. Gazta bat egongo da txosnan, festek iraun bitartean, eta partehartzaileek gaztaren pisua asmatu beharko dute. Datuak betetzeko papera egongo da bertan eta euro baten truke izango da parte hartzeko aukera. Azken egunean, aukera guztiak bilduko dira eta pisua asmatzen duenak edo gehien gerturatzen denak eramango du gazta. Berdinketa badago, zozketa egingo da.
Boluntarioen laguntza, estimatua
Aurreko urteetan bezala, Dobera-Kronikak asko estimatuko du eta gustora hartuko du boluntarioen laguntza, txosna aurrera eramateko: txosnako txandaren bat eginez, edo gosaritarako zerbait ekarriz (bizkotxo, madalenak...). Nahi dena. Lagundu nahi duten herritar edo bazkideek Dobera edo Kronikan jakinarazi behar dute: 943 33 08 99 edo kronika@kronika.eus. Eta noski, laguntzeko beste modu bat ere bada bertara gosaltzera joatea eta herritar guztiei gonbidapena luzatzen diete gerturatzeko.