Bete-betean sartu da lehian Hernaniko Maialen trainerua, asteburu honetan. Gipuzkoako Liga hasi dute neskek, eta aurreneko bi estropadetan, maila onean aritu dira berdeak.
Larunbatean jokatu zuten estreinakoa, erlojupeko saioa Pasaian, eta seigarren izan ziren hernaniarrak, 11:50eko denborarekin. Irabazleak, Zumaiak, 10:46 markatu zuen. Maialenek, atzetik utzi zituen Arraun-Donostiarra, Oiartzungo Itsaslapurrak eta Colindres traineruak.
Zarautzen, zazpigarren
Atzo, berriz, Zarautzen izan zuten estropada, eta zazpigarren izan ziren hernaniarrak. Oraingoan, Arraun-Donostiarrak aurrea hartu zien, eta Zumaia izan zen nagusi, berriro ere.
Horrela, aurreneko bi jardunaldiak jokatuta, Arraun-Donostiarrarekin berdinduta dago Hernani, seigarren postuan. Datorren igandean jokatuko dute hirugarren jardunaldia, Zumaian. Eta hurrengo zita, uztailaren 11n izango dute, Pasaian: Euskotren Ligarako sailkapen proba.
Mutil kadeteek bandera gertu, Udaberriko Batel Ligan
Bateletan, berriz, Udaberriko Liga irabaztetik gertu daude mutil kadeteak. Aurreko lauak bezala, bosgarren estropada ere irabazi egin zuten larunbatean, Tolosan. Datorren larunbatean dute seigarren jardunaldia, Ligako azkena, eguerdiko 12:00etan Zumaian.
Oker haundirik ezean, Hernanira ekarriko dute Udaberriko Ligako bandera.