Gure Esku Dagok ekitaldia egingo du bihar hiriburu guztietan. Oihal kateak eta hautetsontzi erraldoiak egingo dira, herriz herri josi eta apaindutako oihal guztiak elkartuz. Gipuzkoarren hitzordua Anoetan da eta astigartarren gunea ere bertan izango da.
Bertara sartzeko, txartela behar da eta oraindik erosi ez dutenek, gaur erosteko aukera izango dute Joseba Barandiaran plazan (12:00-14:00). Kamixetak ere egongo dira salgai.
Aurretik oihal katea Grosen, hirugarren zubian
Eguna 11:30etan hasiko da oihal kateekin. Astigartarren oihalak Gros auzo aldean egongo dira, 3garren zubiaren iskinean. Lehenengo ekitaldi hau bukatu ondoren, Alde Zaharrean Herri-Dantzak, kantu jira eta txistulariak izango dira. Bitartean, Ilunbeko Familia Gunea eta Anoeta inguruak zabalik egongo dira.
13 eta 16 ateetatik sartu
Ekitaldi nagusiari begira, Anoetako sarrerak 16:30etan zabalduko dira. Bertara sartzeko sarrera erakutsi beharko da eta 13 zein 16 ateetatik sartuz (Xanti jatetxea-Anoeta hotelaren parean). Ondoren, bakoitza dagokion sektorera zuzendu.
Ekitaldi nagusia 20:00etan bukatuko da eta orduan jarraituko dute mini estadioko kontzertuek: Su ta gar, Skakeitan, Ze esatek eta Glaukoma, besteak beste.
Garraio publikoan
Donostiara joateko garraio publikoa erabiltzeko aholkatu dute, «autobus zerbitzu ona dugu eta».
Biharkoa, benetan ikaragarria izango dela nabarmendu dute: «Urtean egindako esfortzua ikusiko dugu, eta gogoratu, Erabakitze Eskubidea denon artean landu beharrekoa da. Beraz, egon adi herriko taldeak deituko dituen deialdietara, igandea pasa ondoren, astelehena dator eta lanean jarraitu behar dugu!».
Eskerrak herritarrei eta jostunei
Astigarragako Gure Esku Dagotik eskerrak eman nahi dizkiete herritarrei eta jostunei, «aste hauetan lan asko egin baitute!».