Urteko zitarik inportanteenetakoa izaten da Axeri Bila, Hernaniko Korrikalarientzat. Aurtengo edizioa ere arrakastatsua izango da, ume eta helduen artean, 800dik gora korrikalari espero baitira.
Sei lasterketa, adinaren arabera
Arratsaldeko 17:30etatik 18:30etara izango dira txikienen lasterketak. Sei mailatan banatuta jokatuko dira, eta ordena izango da: Haur Hezkuntza, LH 1 eta 2; LH 3 eta 4; LH 5 eta 6, DBH 1 eta 2; eta DBH 3 eta 4. Dagoeneko 200 gaztetxo inguruk eman dute izena, eta kalkulatzen da Lehen Hezkuntza eta DBH artean 400-450 inguru izango dira. Haur Hezkuntzako neska-mutilak berriz, 60 inguru izango dira; azken hauek ez dute izena ematen.
Bederatzi kilometro, herrian barrena
Helduen lasterketa ere, jendetsua izatea espero da. 200dik gora korrikalarik eman dute izena, eta 300eko zifra pasatzea aurreikusten da. Arratsaldeko 18:30etan aterako da helduen lasterketa, eta 9 kilometroko bidea izango dute aurretik; 4,5 kilometroko bi buelta emango dizkiote herriari. Izena eman nahi dutenek gaur ere izango dute aukera, 16 euroan, helmugan.
Ricardo Ramosi, omenaldia
Berrogei urtetan CD Hernaniren alde egin duen lanagatik omenaldia jasoko du gaur Ricardo Ramosek; azken urteetan CD Hernaniko lehendakaria izan da Ramos. CD Hernani hainbat kirolek osatzen dute, tartean, atletismoak.
Argazkia ateratzeko deia, lasterketa aurretik
Axeri Bila lasterketa aurretik Hernaniko korrikalarien argazkia ateratzen du urtero Kronikak eta aurten ere deialdi irekia egiten die herritar guztiei: Atarrabiyo parkean aterako da taldeko argazkia, 18:00etan.