Dibertsiorako momentua iritsi zaie hernaniarrei. Urte osoko lana, kezka eta buruhausteak alde batera utzi, eta festarako egunak izango dira datozenak. Eguerdiko 12:00etan, punttu-punttuan, egingo du eztanda suziriak Udaleko balkoitik. Arraun elkartea eta Kantuz abesbatza dira aurtengo omenduak, eta beraz, beraiek izango dute festei hasiera emateko ohorea.
Horren aurretik, aurten bada ekitaldirik. Haur kategoriako XXXVIII. marrazki lehiaketa egingo da Tilosetan, Urumea ikastolak antolatuta. Eta nobedade bat ere bai: estreinakoz, gazteen azeri dantza izango da, 10:00etan hasita.
Arratsaldea, ekitaldiz josia
Arratsaldean ere izango da festarako tartea: Gazte Txokoak antolatuta, zinta lasterketa jokatuko da. Haurren aurreskua ere, gaur arratsaldean izango da. Aurten gainera, berezia: Carlos Sanchizek 50 urte egingo ditu aurreskua zuzentzen, eta momentu hunkigarriak biziko dira. 17:00etatik au-rrera izango da, hori. Ordu berean, Miguel Olloren omenezko karabina tiro txapelketa jokatuko da Txantxangorri elkartean.
Txosnak ere, gaur arratsaldean irekiko dira: 17:30etan izango da pintxo poteoa. Akelarrea 18:30ak inguruan aterako da kalejiran, eta ondoren, antzerkia egingo dute Plazan. San Joan errondak 18:30etatik aurrera girotuko ditu herriko kaleak; eta ordu berean, Kantuz eta Ozenki abesbatzek kontzertua eskainiko dute Urbieta kalean. Salbe Meza nagusia ere izango da gaur, 20:00etan, San Joan Bataiatzailea parrokian. Eta meza bukatuta, 20:30etan, Hernaniko Musika Banadak jarriko du giroa herriko kaleetan, San Joan Martxa joaz.
Eguneko beste ekitaldi nagusia, San Joan Sua, 21:30etan izango da. Herritarren aurreskua eta San Joan Kantaita ere, izango dira suaren bueltan. Eta bertan aterako direnak errespetua eskatu dute, hau da, Kantaitakoek abesten duten bitartean, isiltasuna mantentzea.
Musika nagusi, gauean
Iluntze-gauean ere, izango da zerekin gozatu. Egitarauari erreparatuz gero, musika da nagusi ordu hauetan. 22:00etan, disko jartzaileen gaua antolatu dute Molotoff irratiaren eszenatokian: Txino, Okene Milk Dirty Vinyl eta Urtzi ariko dira musika jartzen. Milagrosa aurrean berriz, gau elektronikoa antolatu dute Paket Falt kolektiboarekin. Tilosetako kiosko ingurua girotzeaz, Laiotz arduratuko da. Eta herrian barrena, danbor hotsak izango dira nagusi. Santa Barbara elkarteko danborjoleak 50garren urtez aterako dira. Eta nola ez, Urumea txaranga ere, aterako da herrian barrena: 01:00etatik aurrera ibiliko dira Kaxkoan gora eta behera.
Musika eta Dantza, San Joan egunean
Patroiaren egunean musika eta dantza ekitaldiak izango dira nagusi. Eguna dianarekin hasiko da, eta ondoren, 11:00–etan, Zaindariaren omenezko meza emango dute, San Joan Bataiatzailean. Handik aurrera, nonahi izango dira ekitaldiak: Gazte Danborrada, herriko txistularien kontzertua, Musika Bandaren kontzertua, Dantza Suelto Txapelketa, Bertsolari eta Trobadore topaketa, kulturen arteko musika emanaldia, DJ gaua, Karaokea, Dantzaldia Ingo al deu taldearekin, txaranga eta kalejira.
Koadrila Eguna, bete-betea
Aurreneko Sokamuturra eta helduen aurreneko Azeri Dantza Koadrila egunean izango dira. Brindisean Muski taldea omenduko dute. Eta egun osoko festa eta algarak iluntzean izango du ginda, Esne Beltzaren kontzertuarekin.
Bertsoak,ostiralean
Txikienentzako ekitaldi ugari izango dira ostiralean. Eta ohi bezala, bertsolarien emanaldia ere izango da Gudarien Plazan: Lujanbio, Agirre, Maia eta Amuriza ariko dira bertsotan; eta gai jartzen, Joxe Luis Urdangarin.
Bola, nobedadea
Bolatoki ibiltaria izango da baserritarren eguneko nobedadea. Euskal Presoen aldeko manfiestazioa, herri bazkaria eta besteko ekitaldiak ez dira faltako. Tartean, bandera jaitsiera.
Udalaren ohar eta gomendioak
SOKAMUTURRA
Ekainaren 25, 26 eta 27an sokamuturra egingo da goizeko 07:30etatik 09:00etara. Ibilbidea izango da: Plaza, Andre kalea, Zapa kalea eta Kale Nagusia. Udalak eskatu du ibilbidearen atariak barrutik giltzatuta egotea eta bizilagunak kalera ez ateratzea, ekitaldiak irauten duen bitartean. Horrez gain, gogoratu nahi dute 16 urtetik beherakoek ezin dutela sokamuturran parte hartu.
HONDAKIN BILKETA
Jaiak direla eta, ekainaren 27ra arte, Kaxko eta inguruan hondakin bilketako eguna aldatuko da. Hondakinak eguerdiko 12:30etatik 14:00etara atera beharko dira, eta ordu horretatik aurrera saihestu behar da, edukiontziak kalean uztea. Gaur papera jasoko da; bihar eta ostiralean, organikoa; eta etzi, plastikoa. Larunbatean, ez da bilketarik izango.
TABERNETAKO ORDUTEGIA
Berriak Ostalarien Elkarteak San Joan jaietan taberna eta jatetxeak ixteko ordutegia arautzeko eskatu du. Hori horrela, eta ordutegi bereziak ezartzeko Udalek duten eskumena kontuan hartuta, Hernaniko Udalak onartu egin du ostalaritza sektoreko establezimenduak ixteko eta musika kentzeko ordutegi berezia luzatzea goizeko 07:00ak arte, ekainaren 23tik 27ra bitartean.