«Dirulaguntza gabe, ekainera arte iraungo genuen, ez gehiago». Oriamendi 2010 enpresaren egoera kritikoa zela azaldu dio Jose Mari Barrenetxeak Kronikari. Eta horrekin, erremontearena ere bai: «enpresa erori balitz, erremontea eroriko litzateke berarekin; ez baita beste inon behar bezala lantzen». Horregatik hartu dute poz haundia, Eusko Jaurlaritzarekin akordioa egitean: «hiru urterako izango da, eta horrekin, jarraitzeko badaukagu behintzat». Datozen egunotan sinatuko dute.
Duela zortzi hilabete hasi ziren mugitzen, erakunde publikoei dirua eskatuz: «urte batzuetarako laguntza nahi genuen, uste genuelako erremonteak ere merezi zuela, esku pelotak, palak eta zesta puntak bezala».
«Hiru urterako akordioa izango da;
ez da dirulaguntza haundia, baina jarraitzeko badaukagu behintzat».
«Esponsorrak bilatzeko lana errazagoa izango da orain»
2017ra arte jasoko du laguntza Oriamendi 2010 enpresak, legegintzaldi bukaerara arte, eta ordurarte, biziraupena bermatuta dauka erremonteak: «nahiz eta dirulaguntza haundia ez izan, jarraitzeko ematen digu». Gainera, segurtasun horrek beste bide batzuk irekiko dituela uste du Barrenetxeak: «orain errazagoa izango da esponsorrak bilatzea, zerbait ziurra eskainiko diegu eta».
Orain arte, enpresa finantzatzen zen frontoiko sarrerekin, apustuekin, publizitatearekin, telebistarekin eta fundazioak kanpoan antolatutako jaialdiekin: «2010ean hasi ginenean, egoera ekonomikoa nahiko ona zen. Baina urte hauetan, sarrerek behera egin dute, eta apustuek ikaragarri. Horrela ez zegoen jarraitzerik».
«Pelotariek poza hartu dute, bere lana errekonozituta ikusi dute honekin»
Horretan ados ziren pelotariak, eta ados ekainean gelditzeko, egoerak berdin jarraitzen bazuen: «denok hartu dugu poza, baina pelotariek bereziki, honekin beraien lana errekonozituta ikusi baitute».
Haiei esker salbatu da erremontea, Barrenetxearen esanetan: «2013an, gauzak ilun zeudenean, planteatu genien diru sarreren arabera kobratzea beraiek, eta egoera ulertu eta ados azaldu ziren. Beraien babesa izan genuen, ez ziguten bizkarra eman. Oso jornal bajuak jaso dituzte garai batzuetan. Eta haiei esker jarraitu du erremonteak martxan».
Horregatik, enpresako pelotari guztiak errekonozitu nahi izan zituzten, 2014ko Urrezko Erremonte Sariarekin. Txapela bana eman zieten, eta bertan idatzita: Zuei esker, erremontea bizirik.
«Orain argi pixka bat ikusten dugu, lehen dena ilun»
Etorkizunera begira, «argi pixka bat» ikusten du Barrenetxeak, lehen dena ilun ikusten zuen tokian: «orain lanean segi behar dugu, hiru urte hauetan, esponsorrak bilatzen, eskolak indartzen...». Beste bi enpresarekin ari dira negoziatzen: «ondo ateraz gero, akaso beste proiekturen bat jarri liteke martxan, eskolaren bat edo. Baina momentuz, Galarreta irekita mantentzea bada nahikoa».