«Ekitaldi berrirako lan-ildoak zehazteko», Gizarterantz II. Foroa egin zuen Orona Fundazioak, aurreko ostegunean. Orona Ideo kanpusean elkartu ziren Bidasoaldea, Oarsoaldea, Donostialdea eta Beterriko hainbat talde, elkarte eta eragile, kultura, kirol, hezkuntza eta gizarte arlokoak.
Iaz egin zuten aurrenekoz foroa, eta helburua da «gizartearen beharrei erantzunez proiektuak sortu eta bultzatzea». Orona Fundazioaren azken urteko jarduera aztertu, eta hurrengo ekitaldirako lan-ildoak finkatu zituzten.
«Orona Fundazioak gizartearekin partekatu nahi ditu garapenerako tresnak eta jakintza».
Horretarako, urtean zehar 102 eragilerekin jarri dira harremanetan, Gizarterantz proiektuaren barruan; tartean, batxilergoko, lanbide heziketako eta unibertsitateko 41 ikastetxe.
Lau lan-ildo, kanpo garapena lantzeko
Fundazioaren barneko garapena lantzeko, zenbait ekimen abiatu ditu Oronak: Diametro 200 proiektua jarri dute martxan, Ideo Factory ari dira prestatzen... Kanpo garapena lantzeko, berriz, lau lan-ildo finkatu dituzte: erakunde publikoak, nazioartea, unibertsitatea eta toki erakundeak.
Foroak, horietako ildo bati erantzuten dio, toki erakundeena, gizartearen beharrei dagokiona: «behar horiek ezagutu eta proiektuen bidez erantzuna eman nahi diegu. Eta era berean, kultura, euskera eta gizarteko beste arloetan eragiteko proiektuak sortzea ere bada helburua».
Azken finean, Orona Fundazioak gizartearekin partekatu nahi ditu «garapenerako tresnak eta jakintza», eta horretarako sortu du Orona Ideo eraikin multzoa ere.