Plaza Berrin bilduko dira gaur Saharako janari bilketan aritzen direnak eta Hernanin bizi diren sahararrak. Kontzentrazioa egingo dute, arratsaldeko 19:00etatik 20:00etara, Takbar Haddiri babesa eta elkartasuna erakusteko, eta bere semearen hilketa salatzeko.
Maiatzaren 15ean, gose greba hasi zuen Haddik, Marokoko kontsulatuaren kanpoaldean, Las Palmasen, salatzeko kolono marokoarrek Mohamed Lamine Haidala semea hil zutela, «okupazioaren autoritateen babesarekin eta medikuen arduragabekeria intentzionatuarekin».
Haidalaren heriotzaren ondoren, ikerketa hasi zuen, autoritateei informazioa eskatuz, eta erantzun gisa, poliziaren persekuzioa eta familiaren etxeari erasoa bakarrik jaso zituen, eta baita torturak ere, Haddik berak azaldu duenez.
«Salatu nahi dugu, ustezko 5 hiltzaileetatik 3 aske daudela oraindik»
Horregatik, talde sozial, politiko eta kulturalek Haddiren gose greba babestu dute, eta salatu «Haidalaren atxiloketa arbitrarioa eta jaso zituen torturak; ustezko 5 hiltzaileetatik 3 aske daudela oraindik; Marokoko sistema sanitarioaren korrupzioa, Marokoko zapalkuntzari lagunduz; eta Haidalaren familiak jasan dituen setioa eta erasoak, poliziaren eskutik».