Ontziratutako gasa, hau da, butanoa eta propanoa erabiltzen dutenak ohartarazi nahi izan ditu Kontsumo Bulegoak: «azken asteetan inguruko herri batzuetan bisitaldiak egiten ari dira, etxez etxe, ustez gas instalazioak aztertzeko». Bulegoak dio: «salaketen arabera, 70 euroko fakturazioak egin dituzte gomak aldatu eta ‘egiaztapenak’ egiteagatik».
Hainbat gomendio
Gauzak horrela, Kontsumo Bulegoak hainbat gomendio egin ditu, iruzurrik ez gertatzeko: «‘egiaztapenak’ egiteko inolako beharrik ez dago; gasaren instalazioen azterketa 4 urtean behin egin behar da, eta azterketa egiten duen enpresak aurrez jakinarazi behar dio erabiltzaileari etxetik pasako dela; gomak ordezkatu baino lehen, iraungitze data begiratu; ez sinatu ezer eta ez eman datu pertsonalik; ez ordaindu zuzenean eskura; eta eskatu beti akreditazioa».