Sasoiko dabiltza Astigarragako pelotariak, eta bere maila erakusten ari dira, Herriarteko Txapelketan. Ostiralean jokatu zuten final laurdenetako joanekoa, Oiartzunen kontra, eta 2-1 nagusitu ziren astigartarrak.
Kadeteetan, erraz nagusitu ziren Olarra eta Esposito (22-6), eta aldearekin irabazi zuten Oiarbidek eta Otañok ere, jubeniletan (22-12). Festa borobiltzeko zorian izan ziren Loidi eta Santxez, nagusietan, baina 21-22 galdu zuten.
Buelta jokatzera, ilusioz
Azkena galduta ere, 25 tantoren aldea lortu zuten astigartarrek, eta ilusioarekin joango dira Oiartzunera, bueltakoa jokatzera. Igande honetan izango da, arratsaldeko 17:00etan.
Gurutzealde, Euskadiko eta Espainiako finaletan
Oier Gurutzealdek, bere aldetik, bi final garrantzitsu jokatuko ditu aste honetan. Ostiralean, Euskadiko Ligako trinketekoa izango du, banaka, Urnietako Loitegiren aurka; Iruran, 20:00etan. 40-28 irabazi zion Prietori, semifinalean.
Eta larunbatean, Espainiako Openeko finala jokatuko du binaka, Loitegirekin batera, Oberena taldeko Santamaria eta Lukinen kontra. Iruñan, 10:00etan.