Udal aurrekontuen partida bat herritarrekin adostu nahi du Udalak. Hori horrela, 2016an ere, aurrekontu partehartzaileak jarri ditu martxan. Aurreneko fasea izan berri da, eta bertan, herritarrek proposamenak egiteko aukera izan dute.
130 proposamen, jasota
Aurrekontu partehartzaileen aurreneko fase horretan herritarrek egindako 130 proposamen jaso ditu Udalak. Eta orain, iritsi da fase berri bati heltzeko garaia: proposamenak adostea.
Zein proposamenek egingo dute aurrera?
Fase honetan erabaki beharko da herritarrek egindako 130 proposamenetatik zeintzuk egingo duten aurrera. Eta prozesu horretan hainbat galdera sor daitezke: «nola adostu zein proposamen txertatuko diren 2016ko Udal Aurrekontuetan? Larrienak direnak? Herritar gehienengana iristen direnak? Aurreko urteetan gai horren inguruan inbertsiorik izan ez dutenak?». Galdera horiei erantzuna ematea izango da fase honen helburua.
Adosten diren irizpideek zehaztuko dute zein proposamenek duten lehentasuna, eta zeintzuk diren bigarren mailakoa.
Udalak jakinarazi duenez, prozesu honi, Irizpideen inguruko eztabaida deitzen diote: «hau da, honek dakar proposamen batzuk indar gehiago hartzea; eta beste batzuk bigarren lehentasun mailara pasatzea. Irizpide hauen inguruko eztabaida oso garrantzitsua da gisa honetako prozesuetan, honek markatzen baitu zeintzuk diren prozesuan indarra hartuko duten proposamenak».
Saio irekia Udalean, asteazkenean
Irizpide horiek zehazteko helburuarekin, bilera edo saio irekia deitu du Udalak asteazkenean. Udalean egin dute hitzordua, arratsaldeko 18:00etan. Bertan, herritarrek, proposamenak ezagutzeko aukera izango dute, eta guztien artean aztertu eta adostuko dute proposamenak lehenesteko aplikatu beharko diren irizpideak.