Ostegunean bukatu zen Goizuetaren ratxa, Herriarteko Txapelketan. Aurreneko lau jardunaldiak irabazi ondoren, galdu egin zuten bosgarrenean, Ultzamaren kontra (3-1), Goizuetako pilotalekuan.
Aizkorbe eta Apezetxeak lortu zuten garaipen bakarra, infantil mailan (18-1). Gainerakoan, Apezetxea anaiek 14-18 galdu zuten alebinetan; Salaberriatarrek 18-22 jubeniletan; eta nagusietan, Zabaletak eta Narbartek 10-22 galdu zuten.
Aurreko asteburuan, berriz, Lekunberrin nagusitu ziren goizuetarrak (1-3). Apezetxea anaiek 18-17 irabazi zuten, Aizkorbe-Apezetxeak 18-4, eta Salaberriatarrek 22-8. Nagusietan galdu zuten Zabaleta eta Narbartek, 11-22.
Tolosan, gaur
Pilotari goizuetarrak Tolosan izanen dira gaur, lau t’erdiko San Joan torneoa jokatzen, 11:00etan. Apezetxea, Alberdi azkoitiarraren kontra ariko da; eta Salaberria, Exposito añorgarraren kontra.
Bihar, berriz, Berria Txapelketan ariko da Iker Salaberria, Doneztebeko Erreka taldearekin, 10:45etan Hernanin. Gaskuerekin jokatuko du, Iruñako Oberena taldeko Mata eta Cordonen kontra.