Bi urte beteko dira bihar, Hernaniko Eskubaloi Taldea martxan jarri zutela berriro, eta ospatzeko, kirola eta festa elkartuko dituzte, eta egun osoko plana antolatu dute.
Goizean, bi partidu izango dira kiroldegian: Hernaniko infantilak, Gipuzkoako selekzioaren kontra jokatuko du 10:00etan, denboraldia bukatzeko; eta 11:30etan, maila haundiko bi talde ariko dira: Helvetia Anaitasuna talde profesionala, eta Zumaiako Pulpo jubenila, Estatuko azpitxapelduna.
Luntxa, bazkaria eta jokoak
Partiduen ondoren, luntxa egingo dute, Atsegindegiko bazkariari bidea egiteko. Paellada antolatu dute 14:00etan, eta mus txapelketa eta haur jolasak izango dira ondoren. Denboraldi honetan eskubaloiaz gozatu duten guztiak gonbidatu dituzte.