Kattalin Miner, Jule Goikoetxea eta Danele Sarriugarteren azken lanaz gozatzeko aukera izango da gaur, Uru tabernan: Erractus. Euskal Herriko eszenatoki desberdinetan izan ostean, Hernanin dute zita, gaur, 20:30etan.
Feminismoak eta umoreak bat egiten duten emanaldia da Erractus. Familia, indarkeria, klase identitatea... eta beste hainbat kontzeptu lantzen dituzte, beti ere, feminismoaren ikuspuntutik, eta umore ukituarekin. Hala definitzen du Kattalin Miner hernaniarrak, emanaldia: «emanaldi hau, diskurtso eta gorputzez plaza-hartze indartsu bat da, ezer baino gehiago. Bestalde, euskal literaturan ere, arrakala bat dela esango nuke: hiru emakume, sortzaileak eta feministak, ahotsa altxa eta plaza hartuz... hor ere badu bere kritika puntua».