Bide Heziketari esker, Hernaniko haurrek ikasiak dituzte oinezko eta txirrindulari arduratsuak izateko jarraibideak. Udaltzainek gidatuta, azken urteetan Bide Heziketaren aldeko lan haundia egin da herriko ikastetxeetan. Dena ez da ordea, aurrerapausoa izan. Udalak dioenez, kontrajarriak diren egoerak ematen dira oraindik, ikastetxe inguruetan: «arau-hausteak, ikastetxe sarreren blokeoa, kotxe-ilarak... bi alderdi horiek erabat kontrajarriak dira, zalantzarik gabe. Heziketa egokia eman nahi zaie, baina beneteko errealitatea oso bestelakoa da».
BiziOn, ikasgaietik praktikara
Hori horrela, Bide Heziketaren bueltan, egitasmo berria sortu du Udalak: BiziOn. Kronikari azaldu dionez, garraiobideak arduraz erabiltzeko ikasgaiari heldu nahi diote: «eguneroko praktikaren bidez, hasitako zikloa osatu nahi dugu. Teoriatik praktikara pasa, jauzi egiteko aukera bat izan».
«Helburu asko lantzeko aukera ematen du»
Udalak azaldu duenez, BiziON egitasmoak helburu asko landu eta zabaltzeko aukera ematen du: «haurrak kirola egin eta ohitura osasuntsuetara bultzatu, bidegorri sarea erabili eta ezagutarazten da, ikastetxe guztietako haurrek elkarrekin egiten dute, autonomia lantzen dute, kutsadura gutxitzen da, lagun berriak egiten dira...».
Floridatik, ikastetxeetara
Maiatzetik martxan da BiziOn egitasmoa. Goizeko 08:30etan ateratzen dira Floridatik bidegorrian barrena. Bidea egiten dute San Antonio, Sagastialde, Antziola, Atarrabiyo, Atsegindegi, Urbieta, Izpizua eta Urumea ikastolatik barrena, eta bertan nahi duena gehitu daiteke taldera. Urumean lautan banatzen da taldea, eta ikastoletarako bidea hartzen dute: Elizatxo, Urumea, Inmakulada eta Laubidietara joaten dira. 8-11 urte bitarteko neska-mutilek hartu dezakete parte, gurasorik gabe; txikiagoek, gurasoen laguntzarekin. Ikastoletatik buelta 16:30etan egiten dute, hau da, lehen aipatutako bidea, alderantziz.