Eguraldia lagun, 35 pertsona inguru elkartu ziren larunbatean Ereñotzun, Putzuzarren inguruan antolatutako auzolanean; horietako 15 inguru umeak izan ziren. Bi momentu nagusi izan ziren. Batetik, Eñaut Agirrek azaldu zituen Putzuzarko iturriaren inguruan egindako ikerketa etnografikoaren emaitzak, jendearen parte hartzearekin eta garaiko teknikak erabiliz. Putzuzarko iturria eta orain gutxi sortu diren bi hezeguneak egokitu ziren, eta urak ihesbidea topatzen duen lekuan zotala jarri zen. Zahar eta gazteek hartu zuten parte, lan honetan.
Inguruko natur balioaren inguruan, otordu ostean
Otordu eder baten ostean, inguruko natur balio ezagunen inguruan aritu zen Ion Garin Barrio herpetologoa. Arreta berezia jarri zuen narrastietan. Eta eguna bukatzeko, Manu Zeberio arkeologoak, Sagastietako lepoan dauden bi trikuharriak erakutsi zituen, eta baita ere, putzuzar ondoan deskubritu berri diren trikuharriak. Eremu honetan ikerketa lan bat egin nahi dute aurten, 2015ean zehar.