Aurreneko tailerra egin berri dute Hernanikidetu programaren bueltan. Hernanikidetu programak bultzatu nahi du herrian sareak sortzea, eta parte hartzen duten enpresekin, gizarte-erantzukizunerako ekintzak adostea. Tailerretan lanketa ezberdinak egiten dira, parte hartzen duten enpresen interes eta inplikazio errealak identifikatzeko, eta Hernanin dauden premiak eta gizarte erronkak aztertzeko.
Tailerrak, bi multzotan
Tailerrean parte hartu dute Arremanitz, Fly Group, Mitxelena tailerrak eta Spora enpresek. Bi multzotan banatuta egin dute lanketa: batetik bizitzaren jasangarritasuna aztertu dute; eta bestetik, ingurumenaren jasangarritasuna.
Bizitzaren jasangarritasuna lantzeko emandako pausuak izan dira: langileen premiak erdigunean jarri eta lan produktiboaren eta ugalketa-lanaren arteko erlazioa hausten saiatu: «hau da, herritarren gizarte-balorazioa areagotu, langileen lana baloratu, hauen ekarpenak aintzat hartu, ugalketa premiei erantzukizunez erantzun...».
Ingurumen jasangarritasuna lantzerakoan, aztertu dituzten gai multzoak izan dira: bizikidetza sustatzeko neurriak hartu eta hori komunikatzeko estrategia eraginkorrak garatu; elikagaiak alferrik xahutzea saihestu; herriko hornitzaileen eta hornitzaile ekologikoen gida bat sortu; garbiketa egunak antolatu...
Proposamenak, agendan
Asmoa da erantzunkidetasuneko agenda bat sortzea, eta proposamen hauek honen oinarri izatea. Orain tailerretan parte hartu duten enpresei aurkeztuko zaizkie, eta haiekin adostuko dira.
Tailerrak Farapi eta The Rights Factory aholkularitza enpresek dinamizatu dituzte, eta Diputazioaren, Beterri Garapen Agentziaren eta Hernaniko Udalaren babesa izan dute.