Zaletuen bultzada ez du inoiz falta izan Errugbi Elkarteak eta atzo ere agerian geratu zen babes hori. Deialdiari erantzunez, 1.000 lagun elkartu ziren Landaren eta mosaiko erraldoia osatu zuten. Kamixeta txuri, gorri eta berdeak jantzita (klubaren koloreak) osatu zuten mosaikoa. Drone baten bidez, airetik hartutako irudiak grabatu zituzten eta ikusgai jarriko dute elkartearen web orrian.
Elkartea 50garren urteurrena ospatzen ari da eta horren harira antolatu zuten ekitaldi berezia. Aurrez, ate irekiak ere izan ziren eta Landareko instalazioak eta elkartea bera hobeto ezagutzeko aukera izan zuten herritarrek. Festa giroan, txarangaren laguntzarekin, goiz pasa egin zuten batzuk, eta beste batzuk arratsaldera arte luzatu zuten ospakizuna. Izan ere, herri bazkaria ere egin zuten Atsegindegin, Garagardo Azokan.