Hauteskunde eguna izan zen joan den igandekoa, eta Astigarragako EH Bilduk emaitzen balorazioa egin du Kronikara bidalitako prentsa oharrean: «Astigarragako Udal Hauteskundeetan EH Bildu izan da garaile. Beraz, eskerrik beroenak berriz ere guregan konfiantza jarri duten herritarrei. Eta bestetik, hautes prozesu guztietan bezala, herritarrez gain, zoriondu nahi ditugu ordezkaritza lortu duten alderdi guztiak».
«Ez dira EH Bilduk espero zituen emaitzak izan»
Emaitzen inguruko lehen balorazioa egiten du EH Bilduk oharrean, eta dio, 4 urteetako kudeaketaren ondoren, lortutako emaitza hauek ez direla izan EH Bilduk espero zituenak: «lan haundia egin dugu udaletxearen jarduna herritarrengana zabaldu eta hurbiltzeko. Gardentasuna eta parte hartzea izan ditugu gure politikaren oinarri, gure printzipioei inoiz uko egin gabe». Hala ere, oharrean diote, horrek ez duela esan nahi asmatu dutenik «ez du esan nahi beti asmatu dugunik, eta horren jakitun ere bagara. 4 urte hauetan kudeaketa eredu bat jarri dugu martxan, baina ez da nahikoa izan gure eredu politikoa indartzeko».
Eskerrak ere, eman dituzte oharrean: «eskerrak ere eman nahi dizkiegu 4 urte hauetan gurekin batera lanean eta ekarpenak egiten egon diren herritar eta auzotar guztiei; eta baita ere kanpaina honetan laguntzen izan ditugun guztiei ere».
«Akordioen eta adostasunen legealdia dugu aurretik»
EH Bilduk dio, herritarrek EH Bildurengan jarri dutela konfiantza Udal Gobernua osatzeko, eta horretan lanean jarriko direla: «ondorengo egun hauetan, Udalean ordezkaritza lortu duten beste alderdiekin jarriko gara harremanetan. Dudarik gabe, akordioen eta adostasunen legealdia dugu aurretik. Eta bide horretan, guztiok egin beharko dugu aurretik, eta bide horretan guztiok egin beharko dugu esfortzua, gure prestutasuna erabatekoa da».
Hitzordua, asteazkenean
Zipotza Kultur Elkartean balorazio batzarra deitu du EH Bilduk asteazkenean, 19:30etan, eta parte hartzeko deia luzatu diete herritarrei».