Hernaniren eta Ataunen arteko final zortzirenetako bueltako partidua jokatuko da gaur Hernaniko pelotalekuan. Etxeko pelotariek lasai ekingo diote norgehiagokari, 3-0 irabazi baitzuten joanekoan. Hiru partiduen artean 16 tanto egitearekin nahikoa izango dute final laurdenetan sartzeko.
Josu Oiaga entrenatzaileak, honako pelotariak aukeratu ditu: kadeteetan, Endika Arizmendi eta Ander Lazkano; jubeniletan, Ekaitz Cisneros eta Suharri Rodriguez; eta seniorretan, Ioritz Arrieta eta Eneko Aizpitarte.
Kadeteetan, Ataungo Iraitz Zubizarretak jokatzen badu, oso partidu zaila izango dute hernaniarrek. Bestela, hernaniarrak izango dira faborito. Jubeniletan, bikote hernaniarra ataundarra baino gehiago da eta ez lukete zailtasunik behar partidua irabazteko. Eta seniorretan, bikote hernaniarra maila honetako onenetakoa da. Faborito izango dira.
«Guztiak animatu nahi ditut pelotalekura»
Rufino Rekalde pelota taldeko ordezkariak honako idatzi hau bidali du:
«Hernaniko pelotariek eta pelotak aurrera egin dezan lanean ari den jendeak tristura haundiz ikusten dugu Hernaniko herritarrek kirol honekiko erakusten duten interes eza. Tristura haundiz ikusten dugu urte osoan zehar familia artekoak bakarrik azaltzen direla pelota lekura. Tristura haundiz ikusten dugu zein ikusle gutxi etortzen den Berria Txapelketa ikustera, kontutan hartuta, pelotari afizionatu onenek hartzen dutela parte eta euskeraz argitaratzen den egunkari bakarrak babesten duela. Tristura haundiz ikusten dugu Hernaniren izenean jokatzen dugun denboraldiko lehendabiziko konpromezua iritsi eta, Hernanin bertan, Markinako ia ikusle gehiago izatea.
Joan deneko 20 urte honetako ibilbidean, lor litezkeen emaitzarik onenak lortu ditugu. Ez da beste kirolik herri honetan, pilotak irabazi dituenak irabaztea lortu duenik. Hiru pelotari, profesional mailara iristea lortu dugu. Bost bider irabaztea lortu dugu Herriarteko Txapelketa, lorpen honek gure herriaren izenarentzat esan nahi duen guztiarekin. Afizionatu mailan jokatzen diren txapelketa guztiak irabazi ditugu, Gipuzkoako txapelketatik hasi eta Munduko txapelketaraino, Euskal Herrikoak, Espainiakoak eta Europakoak tartean. Munduan esku pelotan federatu gehien duen kluba izatea lortu dugu.
Uler liteke jende askok pelota gogoko ez izatea, baita ere belaunaldi berriek sare sozialetan saltzen dizkieten beste kiroletan interes haundiagoa izatea, baina ulertzen zaila gertatzen dena zera da, Hernaniko herriak Euskal Herriko kultura ondarea den kirol bati muzin egitea eta, aldiz, gure kulturarekin zer ikusi txikia duten beste zenbait kirol ikustera trumilka joatea.
Bukatzeko, pelota maite duten guztiak animatu nahi ditut pelota lekura etor daitezen gaur, Herriarteko Txapelketako kanporaketak ikustera. Era berean, animatu nahi nituzke kirol hau ezagutzen ez dutenak edo gogoko ez dutenak pelota lekura ingura daitezen, horrelako egun berezietan, zaletasuna piztu dakien eta pelotaren alde aletxoa gehitu dezaten beraiek ere. Goza dezagun ikuskizun eder honekin eta lagundu dezagun pelota gure herri kulturatik desager ez dadin».