Eskola Agenda 21 programaren barruan, elikadura jasangarria landu dute oraingo honetan, Hernaniko ikastetxeetako haurrek eta atzo, hainbat proposamen egin zizkioten Udal ordezkariei. Bertan izan ziren Luis Intxauspe alkatea, Kistiñe Lujanbio eta Glori Mendinueta zinegotziak.
Ikasleek, honako proposamenak egin zizkieten: Baserritarrei erraztasunak ematea lurrak erabiltzeko eta herrian beraien produktuak saltzeko; ikastaroak antolatzea baratza ekologikoa zer den erakusteko; esne-makina bat gehiago jartzea; supermerkatuetan, hilean behin, bertako produktuen eguna izendatzea; produktu ekologikoak bultzatzea; udal baratza gehiago jartzea; kanpainak egitea eta herritarrei informazioa zabaltzea…
Udal ordezkariek azaldu zieten, orokorrean oso proposamen onak direla eta kontuan hartuko dituztela. «Udaletik saiatzen gara erraztasunak ematen baserritarrei hemengo produktuak ekoitzi eta saldu ditzaten eta zuen ideiak kontuan hartuko ditugu. Udal baratza gehiago jartzea ere aztertuko dugu eta bertako erabiltzaileei ikastaroa eskaintzen zaien bezala, herritar guztiei irekiak izan daitezkeen ikastaroak antolatzea ere aztertuko dugu».
Bertako produktuak eta produktu ekologikoak ekoitzi eta saltzen dituztenei diru laguntzak emateko eskaera ere egin zuten ikasleek eta Kistiñe Lujanbiok erantzun zuen aztertuko dutela: «Agian diru laguntzak zuzenean eman beharrean, zergen bidez eskaini liteke laguntza hori».
Bertako produktuekin lan egingo den sukalde bat jartzeko proposamena ere egin zuten ikasleek eta bertan prestatutako jakiak herriko ikastetxe guztietara zabaldu. Lujanbiok azaldu zuen asmo horrekin lanean ari direla legegintzaldi honetan eta bide horretan jarraituko dutela.
Bizikletaz, eskolara
Osasunari lotuta, kutsadura gutxiago sortzeko, bizikleta astea antolatzea ere proposatu zuten ikasleek. Eguneroko ohitura izatea lortu behar dela adierazi zuen Lujanbiok eta martxan jarri den ekimen baten berri eman zien. Bizikletaz eskolara joateko martxan jarri den ekimena, hain zuzen, eta parte hartzeko gonbitea egin zien.