Langile eta enplegatzaileen artean zubi lana egiteko asmotan sortu da Euskara Plus proiektua. Helburu da langile edo langabetuei laguntzea euskeraz komunikatzeko gaitasunak lantzen, eta, era berean, enplegua lortzeko aukerak haunditzea. Bestalde, enpresa edo enplegatzaileak animatzen dituzte euskera erabiltzen duten langileak kontratatzera.
Banaiz Bagara elkarteak, Enplegu Zentroak eta Hernaniko Udalak jarri dute martxan proiektua, eta antolatu dituzten hiru ikastaroetan lehenengoa datorren astean bukatuko da. Sei ikasle aritu dira bertan, eta egin dituzten aurrerapausoak azpimarratu dituzte. Horietako batek lanpostua lortu du, dagoeneko, eta klaseak utzi behar izan ditu.
Egindako ahaleginaren fruituak jasotzen
Guillermo Martinez, Nerea Lacosta eta Cristina Quintanilla dira ostalariei zuzendutako aurreneko ikastaro honetan parte hartu duten sei ikasleetatik hiru. Euskeraz aritzeko ohitura hartu eta konfiantza indartzeko eman zuten izena.
«Euskera hobetzeko eman nuen izena», dio Guillermo Martinezek. «Orokorrean, gaztelaniaz aritzen naiz, lagunekin, eta. Ohitura hartzea inportantea da, eta konfiantza gehiago lortu dugu. Lanean euskeraz hasten badira, orain konturatzen naiz zertaz ari diren, eta defendatzen naiz. Lagundu digu beldurra kentzeko».
«Lehengoan kafea euskeraz eskatu nuen, eta esan zidaten nabaritzen dela ikasten ari naizela!»
Nerea Lacostak ere ez zuen ohitura haundirik euskeraz aritzeko. «Orain arte ez zitzaidan gustatzen euskera. Ez nuen ikusten beharrik. Baina ezkondu eta hemen bizitzen jarri nintzen. Horrela, garrantzia ematen hasi nintzen, azkenean, ingurua euskalduna da! Haurrek ere esaten zidaten: euskañola zara! Eta pentsatu nuen: Ikastea tokatzen da. Beldurra kentzeko lagundu dit ikastaroak. Nahikoa hitz egiten dut orain! Lehengoan kafea euskeraz eskatu nuen, eta esan zidaten nabaritzen dela ikasten ari naizela!».
Euskeraz aritzeko ohitura gehixeago du Cristina Quintanillak. «Eskolako oharrak beti euskeraz jasotzen ditut eta gurasoekin eta irakasleekin euskeraz aritzen naiz. Lankideekin ere, Errioguardan, euskeraz aritzen naiz. Baina beti iristen da momentu da bi hizkuntzak nahasten ditudana. Ikasten da hanka sartzen. Prozesu bat da, eta batzuetan aurrera egiten dut eta besteetan iruditzen zait atzera egiten ari naizela. Datorren urtean AEKn hasiko gara!».
«Mintzalagunak ere badaude, eta asteazkenetan Gunea garagardotegian euskeraz aritzeko aukera izaten da. Joango gara!», dio Martinezek.
Ekainean, hurrengo ikastaroa
Aurreneko ikastaroa ostalariei zuzendutakoa izan da, eta bigarrena ekainean izango da, pertsonen zaintzan aritzen direneni zuzendua. laster irekiko dute izenemate epea..
«Akatsak onartu eta bizi zaitezke euskeraz»
Bi irakasle izan dituzte Euskara Pluseko ikastaroetan: Petra Elser eta Iñigo Igarzabal.
Klaseak ahalik eta modu arin eta praktikoenean ematen saiatu dira. Petra bera, alemaniarra da jatorriz, eta bere esperientzian oinarritzen da klaseak ematerako orduan. «Euskera ikasteko nire prozesuan garrantzitsua izan zen bereiztea non jakin behar den gauzak ondo esaten, eta non ez den horren garrantzitsua. Gauza batzuk zailak dira euskaldun berrientzat. Akatsak onartu eta bizi zaitezke euskeraz», azaldu du.
Egoera praktikoak
Horregatik, hain zuzen, egoera praktikoen bidez ikasten dute klaseetan. Eguneroko bizitzan aurki dezaketen egoera bat antzeztu eta nola erantzungo luketen praktikatzen dute.
Esate baterako, jatetxe bateko zerbitzaria izanez gero, zer esango zenioke zeliakoentzako jakirik ba ote dagoen galdetzen duen bezeroari? Ulermena eta azkar erantzuteko gaitasuna lantzen dituzte horrela.