HERRIARTEKOA izaten da urteko txapelketarik inportanteena, Astigarragako pelotarientzat. Ostiralean debutatu zuten, final zortzirenetan, eta pozik dira lortutako emaitzarekin. Joaneko partidua izan zuten jokoan, Arrasateren kontra, eta 2-1 nagusitu ziren, kadete eta nagusien partiduak irabazita.
Kadetetan, uste baino gehiago kosta zitzaien partiduan sartzea. Nahiko berdinduta joan zen lehia, baina bukaeran lortu zuten errematea ematea, 18-22 irabazita. Jubeniletan izan zen ezustekoa. Hasiera batean astigartarrak nagusi zirela bazirudien ere, ohi baino huts gehiago egin zituzten. Arrasatek irabazi zuen, 22-15. Kanporaketa nagusietan erabaki zen. Maila honetan bai, Astigarragako bikotea izan zen nagusi hasieratik. 10-22ko garaipenarekin, lan erdiak eginda itzuli ziren etxera.
Bueltako partidua, etzi
Kanporaketa ia erabakita badago ere, bueltako partiduan duen onena eman behar du Astigarragak. Bi partidu irabaziz gero, final laurdenetan izango dira. Aldiz, 2-1 galduz gero, tantoak izan beharko dira kontuan; astigartarrek 9 dituzte aldeko. Bueltako partidua etzi jokatuko da, Astigarragan, 19:30etan hasita.
Hiru bikoteak, goi mailakoak
Joan den urteko marka gainditu, eta finalerdietara iristea da aurtengo erronka; eta ahal izanez gero, sorpresaren bat ematea. Horretarako goi mailako hiru bikote dituzte: kadetetan, Olarra eta Esposito; jubeniletan, Oiarbide eta Otaño; eta nagusitan, Loidi eta Zubiarrain.