Sei zinegotzirekin berdindu dute EH Bilduk eta EAJk, Astigarragako Udal Hauteskundeetan. Alderdi jeltzaleak nabarmen egin du gora, bi zinegotzi lortu baitzituzten aurrekoetan. Hamaikabatek ere bi zinegotzi lortu zituen aurrekoetan, eta oraingoan EAJri eman dio babesa, ez baita aurkeztu.
EH Bilduk egin du behera, zinegotzi bat gutxiago lortuta. Gainera, kontutan hartu behar da bi zinegotzi gehiago izango dituela orain Udalak, 11tik 13ra.
Dena den, EH Bilduk lortu ditu boto gehien: 1.130 boto, guztiaren %42,26. EAJk, berriz, 1.113 boto izan ditu, %41,62a.
PSE-EEk, zinegotzi bat
PSE-EEk ere izango du ordezkaritza Udalean, berak lortu baitu 13garren zinegotzia. 245 boto lortu dituzte sozialistek (%9,16), 2011n lortutakoen bikoitza baino gehiago.
PPk, aldiz, ez du zinegotzirik lortu, 49 botorekin, guztiaren %1,83a.
Erroldak gora, abstentzioak behera
Atzokoan, 4.204 herritar zeuden deituta, 2011n baino 598 lagun gehiago. Abstentzioak, ordea, behera egin du hauteskunde hauetan, eta 2.674k eman zuten botoa, deitutakoen %63,61ak. Hortaz, %36,39koa izan da abstentzioa. 2011n, 2.204 lagunek eman zuten botoa, eta %38,88 ez zen bozkatzera joan. yy
EH BILDU: ANDONI GARTZIA
«Lehen indarra gara, baina emaitza hobea espero genuen»
Sei zinegotzi baino gehiago espero zituen Andoni Gartzia EH Bilduren alkategaiak, eta ez da pozik azaldu emaitzarekin: «lehen indarra gara, baina alde txikiarekin, eta emaitza hobea espero genuen. Aurreko hauteskundeen aldean, antzeko botoak lortu ditugu; beraz, gure bozkatzaileek ez digute hutsik egin. Eskerrik beroena eman nahi diet, botoa eman diguten guztiei. Prentsak eta komunikabideek EH Bilduren kontrako kanpaina egin dute, eta horrek egin digu kalte. Orain, ikusiko dugu EAJk zein jarrera hartzen duen alkatetza erabakitzeko garaian, euskaltzaletasunaren alde egiten duen, edo PSE-EErekin batzen den. Baina guk lanean jarraituko dugu, alkatetzan edo oposizioan, herritarren alde lan egiteko konpromisoa hartu baitugu». yy
EAJ-PNV: Jesus Mari Santos
«Lortutako emaitza oso ona da guretzat»
«Oso gustora» azaldu da Jesus Mari Santos EAJren alkategaia, lortutako sei zinegotziekin: «emaitza oso ona da guretzat. Hauteskundeen aurretik, pentsatzen genuen EH Bildurekin paretsu ibiliko ginela, baina ez hainbeste, boto gutxiren aldearekin. Mesede egin digu bozkatzaile kopurua haunditzeak, eta bi zinegotzi gehiago izateak. Asko igo gara, 2011koekin alderatuta, eta orain, ikusiko dugu noren esku geratzen den alkatetza, PSE-EEren zinegotzi horrekin». Modu berean, jasotako babesa eskertu nahi izan zuen: «esker haundia eman behar diet herritarrei, botoa eman diguten guztiei, eta baita Hamaikabati ere, bere laguntzagatik. Ea denon artean lortzen dugun Astigarraga hobe bat».