Luis Intxauspe izango da hernaniarren Alkate, datozen lau urteetan. EH Bilduk irabazi ditu hauteskundeak, gehiengo absolutuarekin, eta bederatzi zinegotzi izango ditu Udalean; aurreko legegintzaldiko berak. 4.182 hernaniarrek eman diote botoa EH Bilduri, 2011n baino 23 boto gutxiago.
EAJ-PNV izan da bigarren alderdi bozkatuena, 2.071 boturekin; 2011n baino 340 boto gehiago lortu ditu. Zinegotzi bat gehiago izango du EAJk Udalean, lau guztira; aurreko legegintzaldian 3 izan zituen.
Udaleko hirugarren indarra, berria izango da: Orain Hernani! plataformak 1.348 boto jaso ditu, eta bi zinegotzirekin hasiko du Udaleko ibilbidea.
Azkenik, PSE-EE alderdia laugarren indarra izatera pasa da hauteskunde hauetan. Bi zinegotzi izango ditu 2015-2019 legegintzaldian; aurrekoan baino bat gutxiago. Boto kopuruei erreparatuz gero, 1.077 herritar izan dira PSE-EE alderdia bozkatu dutenak; 2011n, 1.613 izan ziren.
Alderdi Popularrak ez du zinegotzirik lortu hauteskunde hauetan. 285 herritarrek eman diote botoa; 2011n, 480 izan ziren.
Hirrugarren aldiz, gehiengo osoa
Hirugarren legegintzaldia izango da, Udalean gobernatzen duen alderdiak gehiengo osoa izango duela. Aurrenekoa Euskal Herritarrokek lortu zuen 1999an; bigarrengoa EH Bilduk izan du aurreko legegintzaldian; eta hirugarrena oraingo honetan izango du, EH Bilduk.
Hirugarren aldiz, Udalean gehiengo absolutuarekin gobernatuko du alderdi politiko batek. 1999an Euskal Herritarrok alderdiak gobernatu zuen; joan den legegintzaldian, EH Bilduk gobernatu zuen; eta hastear den honetan ere, EH Bildu izango da nagusi.
Partehartzeak behera egin du Hernanin. 8.963 herritar gerturatu ziren atzo botoa ematera, hau da, %60,85a. 2011n 9.641 izan ziren botoa eman zutenak, %65,24.
Abstentzioak, gora
Botoa ematera gerturatu ziren herritar kopuruak behera egin du 2015ean. Atzo 8.963 herritarrek bozkatu zuten, hau da, zentsoaren %60,85ak. Abstentzioa %39,15ekoa izan zen. 2011n aldiz, 9.641 herritarrek eman zuten botoa, %65,24ak; eta abestentzioa %34,76koa izan zen.
EH BILDU:
Luis Intxauspe
«Elkarrekin Hernani hobetzen segiko dugu»
Pozik dago Luis Intxauspe lortutako emaitzarekin: «Pozik gaude, emaitzak ikusita, oso onak dira. Gehiengo absolutua mantentzea zen helburua, eta lortu dugu. Aldaketak izango dira, talde berri bat izango baita Udalean». Esker hitzak ere izan ditu, EH Bildun konfiantza azaldu duten guztientzat: «eskerrik asko bozkatu diguzuen guztioi, eta gugan konfiantza azaldu duzuenoi. Elkarrekin Hernani hobetzen segiko dugu».
EAJ-PNV:
Andoni Amonarraiz
«Zinegotzi bat gehiago izan arren, ez dugu helburua lortu»
Zinegotzi bat gehiago lortu badu ere, helburua gobernatzera iristea zela azaldu dio Andoni Amonarraizek Kronikari: «ez dugu helburua lortu. Gobernatzera iritsi nahi genuen, edo bestela, negotziatzeko aukera izan. Eta ez da hala izan, EH Bilduk gehiengo absolutua lortu baitu. Hala ere, zinegotzi bat gehiago lortu dugu, eta eskerrak eman nahi dizkiogu botoa eman eta gugan konfiantza jarri duten guztiei». Hastear den legegintzaldiari dagokionean, dio: «partehartzaileagoa izatea espero dut, alderdi guztien arteko elkarbizitza hobea izatea. EH Bildu zoriondu nahi dut, lortutako emaitzengatik».
Orain Hernani!:
Jaione aristregi
«Lau urte ditugu aurretik, eta lana gogor egiteko prest gaude»
Oso pozik azaldu da Jaione Aristregi, Orain Hernanik! lortutako emaitzengatik: «pozik gaude, oso pozik. Aurreneko aldia da Herri Plataforma bat Udalean izango dela. Orain lau urte izango ditugu aurretik, eta lana gogor egiteko prest gaude. Jendearekin egon behar dugu, partehartzea bultzatu... lanean segi». Beraiengan konfiantza azaldu duten guztiei eskerrak eman nahi dizkie Aristregik: «eskerrak eman nahi dizkiegu botoa eman diguten guztiei, eta baita ere, bide honetan lagundu diguten guztiei ere».
PSE-EE:
Ricardo Crespo
«Emaitzak ez dira onak, zinegotzi bat galdu dugu»
Ricardo Crespok, PSE-EEko alkategaiak, emaitzak txarrak izan direla azaldu dio Kronikari: «emaitzak ez dira onak izan, zinegotzi bat galdu baitugu. EH Bildu zoriondu nahi dut irabazi eta gehiengo absolutua lortu izanagatik; eta era berean, EAJ-PNVri zinegotzi bat irabazi duelako; eta Orain Hernaniri! Udalean izatea lortu, eta bi zinegotzi lortu dituelako».