AUZOLANERAKO zita jarri berri du Aranzadik, Ziraba proiektuaren bueltan. Urtarrilaren 31n, auzolanean, Putzuzarreko iturria eta inguruko hezeguneak berreskuratu zituzten, inguruko auzotarrek lagunduta. Kronikara bidalitako oharrean azaldu dutenez, eraikitze sistema zaharraz baliatu ziren lan horretarako, «baina teknika baliagarria bada ere, ez da iraunkorra». Hori horrela, auzolanerako hitzordu berri bat jartzea erabaki dute: astebete barru izango da, maiatzaren 31n. Helburua izango da hezeguneak kudeatzea: «bide batez gainera, gerturatzen diren guztiek Akola inguruak erakusten duen natur eta kultur ondorea ezagutzeko aukera izango dute». Hamaiketakoa ere izango da.
Aldez aurretik, izen ematea
Maiatzaren 31n egin dute zita, 10:00etan, Akolako atsedengunean. Oinez gerturatzea gomendatu dute, ez baitago kotxe askorentzat aparkalekurik.
Era berean, jakinarazi dute, auzolanera joan nahi duenak izena eman behar duela, asegurua kontratatu behar baita. Izen ematea maiatzaren 29an bukatuko da, 13:30etan. Izena eman nahi duenak 943 46 61 42 telefonora deitu dezake, edo email bat bidali idazkaritza@aranzadi.eus helbidera.
Ahal den neurrian, garai
bateko teknikak erabiliz
Putzuzar ondare kultura eta historikoaren parte da. Aranzadik azaldu duenez, berreraikitze prozesuan, ahal den neurrian, garai bateko teknikak erabili dituzte: «inguruetako harri, lur eta egurra erabili ditugu, beti ere iturri eta ur geldiuneen egitura zaharrak errespetatuz». Proiektuak Ereñotzuko Auzo Udalaren, Hernaniko Udalaren eta Diputazioaren babesa du.