Mendekosteko jaien bueltan, joan den urtean sortu zenuten Auzokide elkartea. Nolakoa izan da hasierako esperientzia hori?
Urtea konturatzerako joan da! Azkar pasa da denbora, eta lan asko egin behar izan dugu. Hala ere, hasierako gogoa eta ilusio bera mantentzen dugu.
Jaiak auzo elkartearen hasiera besterik ez zirela izango aitortu zenuten joan den urtean. Zein izan dira urte honetan eman dituzuen pausoak?
Aurreneko urte honetan emandako pauso garrantzitsuenak hauek izan dira: batetik, Auzokide elkarteak ordezkaria du Hernani Erabaki mahaian; alderdi politikoekin egin berri den mahai inguruan ere hartu du parte Auzokidek; eta azkenik, hilero udaletxean egiten diren Partehartze Batzordeko bileretan ere hartzen du parte. Bestalde, aurreneko aldiz Santo Tomas eguna ospatu genuen, auzotarrekin batera.
Auzo elkartea berriro ere auzoa elkartzeko trena gisa erabili nahi zenutela zenioten. Lortu al da hasierako helburu hura?
Bide onetik goazela pentsatzen dugu, pixkanaka pixkanaka lortuko dugulakoan gaude.
Elkartean adin guztietako auzotarrak egoteari garrantzia ematen diozue. Hori ere lortu al da?
Momentuz baietz esan daiteke. Floridako gazte eta helduok osatzen dugu elkartea.
Zein dira etorkizunera begira dituzuen asmo eta erronkak?
Etorkizunera begira dugun erronkarik haundiena da, antolatzen ditugun ekintzetan auzotarrek parte hartzea, animatzea.
«Atzo inauguratu genuen elkartearen lokala izango dena, eta etorkizunean, elkarteko kideak elkartuko garen gunea izatea
nahi duguna»
Zein behar ditu auzoak, eta zer dago zuen esku?
Egia esan, oraindik ez ditugu zehaztu auzoak izan ditzakeen beharrak. Baina argi duguna da, gure beharren eta desioen proposamena luzatu behar diogula udaletxeari, edo dagokionari.
Lokal bat utzi dizue Udalak eta egokitzen aritu zarete. Zein da eman nahi diozuen erabilera?
(Barrea). Atzo, jaien hasierarekin batera inauguratu genuen lokala. Urte osoa pasa dugu lokala erreformatzen, beraz oraindik ezin izan diogu erabilerarik eman. Aurrerantzean, elkarteko kide guztien artean erabiliko den zerbait izatea nahi dugu.
Aurten festetako bigarren urtea duzue. Auzo elkartea sortuta antolatu duzue egitaraua. Zer izango dute berezi 2015eko Mendekosteko jaiek?
Etxeberri Auzoko helduen danborrada berreskuratu dugu; eta aurtengo paella jana 500 lagunentzat prestatuko dugu; aurreko urtean 400 lagunentzat egin genuen.
Zapiak, kamisetak... saltzen aritu zarete aurten ere diru sarrerak lortzeko. Diruak arazo izaten jarraitzen al du?
Bai, dirua beti datorkigu ondo; geroz eta diru sarrera gehiago, geroz eta festa hobeak antolatuko baititugu. Aurten kamiseta eta zapiez gain, txapak eta giltzatakoak ere saldu ditugu.
Urteko aurreneko festak dira Mendekosteak. Herritarrak Etxeberri-Floridara animatu nahi?
Aurten Etxeberriko pelotalekuan karpa haundi bat jarriko dugu, mahai eta eserlekuekin, egun guztietarako. Beraz, eguraldi txarra ez da aitzakia izango jaiez gozatu ahal izateko. Festa girorik ez da faltako!