Hiru batzorde izango dira astelehenean, Udaletxean, eta horietako bitan erabaki garrantzitsuak hartuko direla adierazi du Udalak. Hain zuzen, Haur Eskola, Ikastolako aterpea eta Zarkumendegiko bidegorriaren inguruko erabakiak hartuko dituzte.
Obra eta zerbitzuen batzordean (18:00), Haur Eskolako lokal berriaren egokitze lanak aztertuko dituzte. 76.392 euro inbertituko ditu Udalak lokal honen egokitzapenean eta irailerako prest egongo da.
Aurrekontu parte hartzaileetan, Ikastolako aterpea handitzeko eskaria egin zioten herritarrek Udalari eta proiektua nola egin aztertuko du obra eta zerbitzuen batzordeak. Aterpearen proiektuak 3 fase aurreikusten zituen, eta 1goa egin zen iaz. Udalak azaldu duenez, proiektua amaitzea lehenetsiko da, eta nahiz eta aurrekontu parte hartzaileetarako aurreikusitako aurrekontua gainditu, 2garren eta 3garren faseak egingo dira. Guztira 190.000 euro inbertituko dira bi fase hauek egiten.
Bidegorria, Ogasun batzordean
Ogasun batzordean, Zarkumendegiko bidegorriaren inguruko bi gai aztertuko dira. Batetik, desjabetze prozedurak izango dira hizketagai. Udalak akordioak lortu ditu desjabetzeak egiteko, lur jabeekin bildu eta gero. Bestetik, bidegorriaren lanak esleitzeko lehiaketa publikoaren oinarriak aztertuko dira.