Bihar, maiatzak 24, Udal eta Foru Hauteskundeak izango dira. Astigarragari dagokionez, lau hautagaitza izango dira aukeran: EH Bildu (Andoni Gartzia alkategaia), EAJ-PNV (Jesusmari Santos alkategaia), PSE-EE (Mikel Duran alkategaia) eta PP (Jacobo Caparros alkategaia).
Datorren legegintzaldian, gainera, Astigarragan bi zinegotzi gehiago izango dira. Hain zuzen, 13 izango dira. Oraingo honetan, 4.204 astigartarrek izango dute bozkatzeko aukera.
Batzar Nagusietarako, 8 hautagaitza
Gipuzkoako Batzar Nagusietarako hauteskundeak ere izango dira eta zortzi hautagaitza izango dituzte aukeran astigartarrek: EH Bildu (Xabier Olano diputatugai), EAJ-PNV (Markel Olano diputatugai), PSE-EE (Denis Itxaso diputatugai), PP (Juan Carlos Cano diputatugai), UPyD (Manu Aguirre diputatugai), Podemos (Juantxo Iturria diputatugai), Ciudadanos (Jonathan Calvo diputatugai), Irabazi-Ganar Gipuzkoa (Arantza Gonzalez diputatugai).
Kotxearekin joateko aukera, zailtasunen bat dutenek
Ikastolako obrengatik, Kiroldegi inguruan ez dago aparkatzeko plazarik. Baina kotxearekin gerturatu ahal izango dira, bozkatzera joateko zailtasunen bat dutenak. Bozkatzeko ordutegia, 09:00etatik 20:00etara izango da. Esan bezala, kiroldegira jo beharko dute herritarrek.
Ale berezia, astelehenean
Kronikak ale berezia argitaratuko du astelehenean, Urumeako emaitza guztiekin.