Jakoba Errekondo, nekazaritza ekologikoan aditua, izango dute aholkulari bihar, Karabelekora gerturatzen direnek. Goizeko 11:00etan hasita, hitzaldia eskainiko du paisajista usurbildarrak: batetik, Bizi baratzea liburua aurkeztuko du, eta bestetik, baratzezaintzari buruzko aholkuak emango ditu.
«Modu atsegin eta ulerterrazean, baratzezaintza ekologikoari buruzko hainbat argibide eskainiko ditu, abentura horretan murgildu nahi duten hasiberrientzat eta baita dagoeneko lehen urratsak eginda dituztenentzat ere», azaldu dute Karabelekon.
«Baratzearekiko grina pizten ari da azkenaldian»
Errekondok berak adierazi du, «baratzearekiko grina pizten» ari dela azkenaldian, eta grina hori aprobetxatu behar dela: «baratzezaintza, baina bertakoari lotuta, betiko jakintzari helduko diona eta oinarrian kalitatea izango duena».
Hain justu, bertakora ekarrita idatzi du liburua, «baratzearen sekretu eta trikimailu guztiak» bilduta.