Hernanin dago berriro Il Circo Italiano konpainia, eta espektakulu berri batekin dator, Bellissimo zirkoarekin: «benetako festa eszenikoa izango da, kolore eta itzalen eztanda», aurreratu dute. Bi orduko saioak eskainiko dituzte, eta gaur bertan izango da aurrenekoa, arratsaldeko 19:00etan.
«Ez da aurreko urteetakoa bezala, espektakulu berri asko dauzkagu. Esaterako, itzalekin saio berezi bat egingo dugu, istorio bat kontatuz, eta aurreneko aldia da zirkoan horrelako zerbait egiten dela», azaldu dute. Trapezioak, zintak, magia saio berri bat...
Pailazoek, «arrakasta haundia» haur eta helduekin
Baina bereziki, Paute eta Capitano pailazoak destakatu nahi dituzte: «arrakasta haundia dute, haur eta helduekin; ganberroak dira, oso desberdinak. Eta gainera, Euskadin sortutako pailazoak dira, hemen hasi ziren aktuatzen». Horregatik, bertako ikusleekin daukaten «konplizitatea» nabarmendu dute.
Hernanin bertan, hirugarrenez izango dira: «oso pozik etortzen gara, harrera ona daukagu, eta esperientzia oso polita da».
Bost sarrera doble zozketatuko ditu Kronikak, larunbateko 19:30etako saiorako, Doberako bazkideen eta irakurleen artean.
Kronikak, bost sarrera doble zozketan
Gaur izango da aurreneko saioa, 19:00etan, eta ordu berean eskainiko dute biharkoa ere. Larunbatean, berriz, bi saio izango dira, 17:00etan eta 19:30etan. Azken horretarako, bost sarrera doble zozketatuko ditu Kronikak: bi Doberako bazkideen artean, eta beste hiru irakurleen artean.
Parte hartzeko, Facebookeko Urumeako Kronika orrialdean, albiste honetan komentario bat utzi behar da, galdera erraz honi erantzunez: Nola dute izena Bellissimo zirkoko bi pailazoek?
Zozketa, bihar eguerdiko 12:00etan egingo da, asmatzen dutenen artean.