Astigarragako Eusko Alderdi Jeltzaleak aurkeztu du maiatzeko udal eta foru hauteskundeetarako hautagai zerrenda. Guztira, 13 kidek osatzen dute, Jesus Mari Santos buru dela.
«Oso talde plurala da, adin eta lanbide ezberdinetako gizon-emakumeek osatua», azaldu dute. Izan ere, «helburua da guztiontzako Astigarraga baten alde lan egitea, bazterketarik gabeko herri plurala nahi dugulako».
Herritarren iritzia kontuan
Astigarraga herritarren eskutik hazi arazi nahi dutela diote, «bizilagunei entzun eta haien beharrei erantzuteko». Zentzu horretan, ezker abertzalearen gobernatzeko era salatu dute, «Parte hartzeaz hitz egiten dute, baina ez dute praktikan jartzen, eta euren proiektuak inposatzen dituzte, Atez Atekoarekin ikusi ahal izan genuen bezala». Hori horrela, galdeketa egiteko konpromisoa azaldu dute: «hondakinak biltzeko herritarren oniritzia daukan beste sistema bat ezarriko dugu».
Plan Orokorra garatu
Bestalde, 2009an EAJk onartu zuen Plan Orokorra garatzen jarraitzeko asmoa azaldu du. Izan ere, «ezker abertzalea plan horretan aurreikusten ziren proiektu eta aurrekontuez baliatzen ari da bere proiektu eza ezkutatzeko».
Era berean, proiektu gehiago aurreikusten ditu: «babes ofizialeko etxeak, kultur etxe berria, auzoetan inbertsioak egitea, kaleak eta landa guneak atonteko beste 100.000 euro gordetzea, zerbitzu sozialak bermatzea, kiroldegi berria, Astigarraga sagardoari lotutako gune turistiko bilakatzea, Buruntzaldea osorako garapen agentzia eratzea eta adineko eta gazteen aisialdirako proposamenak hobetzea».
Hautagaien zerrenda
1. Jesus Mari Santos: zerrendaburua, alkategaia.
2. Zorione Etxezarraga.
3. Jon Arregui.
4. Ramon Aranzasti.
5. Olaia Pastoriza.
6. Nerea Zusberro.
7. Jon Basterra.
8. Josetxo Goicoechea.
9. Zigor Irastorza.
10. Pilar Torrecilla.
11. Inaxio Uriondo.
12. Felix Zusberro.
13. Urkiri Salaberria.