Festa haundia izango dute txalapartariek, datozen egunetan Hernanin. 29garren edizioa izango du Txalaparta Festak, eta dagoeneko hasi dira motorrak berotzen: Egurrezko bihotza argazki erakusketa, Aitzol de Karlosena, ikusgai dago Joxe Mari tabernan.
Txalaparta hotsak, ordea, etzi iritsiko dira herrira. Kontzertua eskainiko du Munduko Beat talde madrildarrak, 19:30etan Biterin. Sarrerak 6 euroan daude salgai, emailez: aitorbeltran@yahoo.es edo soinuenea@soinuenea.org.
Egun nagusia, larunbata
Larunbatean izango du Txalaparta Festak, bere egun haundia, Tilosetan. Eguerdian, txalaparta erromeriarekin hasiko dira, eta herri bazkaria egingo dute ondoren. Bertan bazkaltzeko, txartelak erreserbatzea komeni da: 16 euroan, aurrez aipatutako bi emailetan.
Eta arratsaldean izango da ekitaldi nagusia. Makina bat emanaldi izango dira, hamaika tokitatik etorritako txalapartariekin: Oreka TX, Zukut bizkaitarra, Hutsun nafarra, Harresian Zulo arabarra, Munduko Beat bera, Hernaniko Ttakun Ttan Ttakun...
Gauera arte luzatuko da festa, Txalaparta party apartarekin; 23:00etan Atxur tabernan, DJ Barrurekin.
Egitaraua
Maiatzak 23 arte, Argazki erakusketa: Egurrezko bihotza, Aitzol de Karlos. Joxe Mari tabernan.
Maiatzak 22, Kontzertua: Munduko Beat (Madril). 19:30etan Biterin. Sarrera, 6 euro*.
Maiatzak 23, Tilosetan:
12:00, Txalaparta erromeria: Hernani Musika Eskolako Alboka, Dultzaina, Trikitixa eta Txistu taldeak kale bueltan. Txalaparta saio libreak.
14:30, Herri bazkaria. Txartelak erreserbatzea komeni da, 16 euro*.
17:00, Txalaparta ekitaldi nagusia: Bertso Eskolako bertsolariak; Zuaznabartarrak eta Goikoetxeatarrak; Zukut (Bizkaia); Hutsun (Nafarroa); Harresian Zulo (Araba); Oreka TX (Gipuzkoa); Munduko Beat (Madril); Ttakun Ttan Ttakun (Hernani).
23:00, Txalaparta party aparta: DJ Barrurekin, Atxur tabernan.