«Santiagomendiko ilarra beti izan da famatua eta ezin dugu hori galtzen utzi. Ilarrarekin hasi gara, baina helburua da gainontzeko produktuekin ere jarraitzea. Bere garrantzia ematea lortu nahi dugu baratzari; gure sustraiei eutsi behar diegu», halaxe adierazi zuen atzo Charo Zapiain Baratz elkarteko presidenteak. Laugarren urtez, Ilarraren Jardunaldia antolatu du elkarteak, Udalaren eta Behemendiren laguntzarekin.
Bihar hasiko da jardunaldia, ilarrarekin egindako pintxo-potearekin eta igandera bitarte, hitzaldia, bisita gidatuak eta azoka izango dira, besteak beste.
Andoni Gartzia alkateak eskerrak eman zizkien Baratz elkarteko kideei, «egindako lanagatik», eta herriko baserritarrak eta baratzak ere goraipatu zituen. «Eta ekitaldi polit honekin, omenalditxoa egiteko aukera izango dugu». Gonbitea luzatu zuen ekintzetan parte hartzeko.
Diego Gelaberti sukaldariak ilarraren inguruan hitz egin zuen: «Erabilera askoko produktua da, edozer gauzarekin geratzen da ondo eta oso preziatua da sukaldean».
Aurtengo uztarekin, baserritarrak penetan dira: «Ez du eguraldiak lagundu, eta ilar gutxi dago. Euri asko egin du kolpera eta ito egin dira», azaldu zuen Miel Joxe Astarbek.
EGITARAUA
Bihar, osteguna
19:00, Ilarrarekin pintxo-potea, Astigarragako tabernetan: Astiarra, Bukoi, Ekaitz, Ibailur, Ikatza, Kaizoku, Kizki, Kupela, Pastoriza, Pentxe, Robin, Sagartxo, Txiki, Zipotza.
Ostirala
10:00, Baratzetara (eliza atzean) bisita, Herri Eskolako haurrentzat.
18:30, Hazieraren hitzaldia (Marc Badal): ‘Haziaren garrantzia nekazaritzaren historian’, udaletxeko areto nagusian.
Ondoren, ilar dastaketa Kontzejupean, Charo Zapiain eta Roberto Ruizekin.
Larunbata
11:00, Baratzetara bisita gidatua, Kontzejupetik abiatuta.
Igandea
Foru enparantzan:
09:30, Txirriskla eta Musika
Eskolako txistularien diana berezia.
10:00-14:00, Azoka berezia. Ilarra eta Euskal Herriko produktuak.
11:00-13:00, Umeentzako
euskal jolasak.
14:30, Ilar menua Roxario jatetxean. Txartelak, Roxarion (943551138) edo info@roxario.com.