Gipuzkoako Bertsolari Txapelketako sailkapen faseko aurreneko itzulia bukatuko da gaurko saioarekin; Hernanin izango da, Sandiusterrin, 11:30etan eta 17:30etan. Sarrerak bertan jarriko dira salgai: saio bakoitzak seina euro balio du, baina bi saioetarako sarrera erosiz gero, 9 euro izango dira.
Goizeko saioan ondorengo bertsolariak ariko dira: Arnaitz Lasarte Santa Kruz eta Unai Gaztelumendi Arandia, Hernaniko Bertso Eskolako kideak, eta Joseba Lasagabaster, Haritz Casabal, Manex Astigarraga eta Jon Maia.
Arratsaldeko saioan, berriz, Hernaniko Bertso Eskolako kide bakarra ariko da: Oier Iurramendi. Gainontzeko bertsolariak izango dira: Josu Oiartzabal, Aitzol Iturbe, Nahikari Gabilondo, Ane Zuazubiskar eta Ane Labaka.
Oiartzabal nagusi, Antzuolan
Atzokoan beste bi saio jokatu ziren; Antzuolan bata, eta Zaldibian bestea. Antzuolan izan ziren, hain zuzen Hernaniko Bertso Eskolako beste bi bertsolari: Iñaki Zelaia eta Eli Pagola. Irabazlea, Arkaitz Oiartzabal izan zen.