Ostiralean, salaketa zibil bat medio, epaiketa egin zen, eta ondorioz, Karbonera Etxe Okupatua ekaina hasieran desalojatuko dute. Hori horrela, prentsaurrekoa eman zuten atzo Karbonerako hainbat kide eta lagunek, eta protesta eguna antolatu zuten.
«Zukua atera diogu»
Azaldutakoaren arabera, Karbonerak 9 urte egin ditu okupatuta, eta urte horietan, «zukua atera» diotela azpimarratu zuten: «Karbonerak etxebizitza eskubidea gauzatu du urte hauetan guztietan, eta ez hori bakarrik; hausnarketarako, ekintzarako, jakintza transmisiorako... topagune ere izan da».
«Eskubideak ez dira zozketatzen».
Karbonera okupatu eta gutxira, «prozesu penal bat hasi zen, Alkain enpresa eta Bostak promotoraren salaketa medio», baina orduan ez zen desalojorik izan. Orain bi urte, ordea, salaketa zibil baten ondorioz, «negoziaketa batean parte hartzera behartuak izan ziren Karbonerako etxekideak». Horrela, urtebeteko lagapen kontratua sinatu zuten, 2014ko apirilera arte, eta orduan, desalojatu egin zituzten. Baina uztailean, berriro okupatu zuten hainbat emakumek, proiektu feminista martxan jartzeko.
Hainbat aldarrikapen
Datozen egunetan egoeraren berri ematen segiko dute. Bitartean, hainbat aldarrikapen azpimarratu dituzte: «Etxebizitza eskubidea espekulaziorako okasio bihurtu da; arazo soziala da, denon ardura da, eta Babes Ofizialeko Etxeak ez dira konponbideak, eskubideak ez dira zozketatzen».