Goizutrail eta Ereñotzuko mendi lasterketak izango dira datozen asteetan. Bi lasterketetan, izen ematea zabalik dago.
Goizuetakoa gaur zortzi, maiatzaren 16an izango da. Bi ibilbide izanen dira aurten: motza, Eneko Elorri igoz (10 km); eta luzea, Mandoegiko tontorra eginez (25 km).
Motza egiten dutenek, 15 euro ordaindu behar dituzte, eta luzea egiten dutenek 20 euro. Goizuetarrek, 5 euro merkeago izango dute inskripzioa.
Sariak izango dira lasterketa luzeko hiru gizon eta emakume onenentzat: 150, 100 eta 50 euro. Eta goizuetar onenak ere, sari potoloa jasoko du: 100 euro. Izena emateko: www.herrikrossa.com.
Ereñotzun, Aiako Harria Parke Naturalean
Ereñotzuko mendi lasterketa ekainaren 7an izango da. Azken urteetako ibilbide bera izango da, 12 km ingurukoa, Aiako Harria Parke Naturalean barrena. Urdaburu igo beharko dute parte hartzaileek. Prezioa: 10 euro. Izena Ibai Mendin edo www.kirolprobak.com web gunean eman liteke. Lehenengo 3 emakume eta gizonak sarituko dira.
Bestalde, iaz bezala, umeek ere izango dute beraien lasterketa. 5 eta 11 urte artekoentzat izango da, kilometro batekoa.