Maila haundiko boxeo belada prestatu dute gaurko, Astigarragako kiroldegian. Gaueko 22:30etan hasiko da, eta sei borroka izango dira: motorrak berotzeko erakustaldi bat, aurrena; eta bost borroka interesgarri, ondoren. Tartean, bi txapeldunen arteko borroka, eta Gipuzkoako Txapelketaren final bat.
Errenteria, Anoeta eta Bilboko gimnasioetatik datoz boxeolariak; azken bi horiek, probintziako txapeldun izan dira, taldeka.
Gipuzkoako finala, jokoan
Reda eta Carlos Barredaren arteko borroka izango da aurrena, eta Youssef eta Kevin lehiatuko dira ondoren. Hirugarren borrokan, berriz, Yosua eta Amer ariko dira, elkarren kontra.
Azkeneko biak izango dira borroka erakargarrienak. Laugarrenean, Leo Berreaute eta Mario Ospina lehiatuko dira. Hirutan izan da Euskadiko txapeldun Berreaute, oilar-pisuan; Ospina, berriz, euli-pisuan da Euskadiko txapeldun. Tarteko pisu bat adostu dute bien artean, 54 kilo, borroka honetarako.
Eta azkeneko borrokan, Gipuzkoako Txapelketaren final bat izango da jokoan: erdi pisukoa, Moha eta Maxiren artekoa.
Sarrerak, kiroldegian
Hiru minutuko hiru asalto jokatuko dituzte. Belada ikusteko sarrerak, kiroldegian bertan erosi daitezke. Sarrera orokorra 10 euro dira; aulkian 12 euro; eta haurrena 4 euro.