Aimar Olaizola ez da bere onenean izan azken aldian, lesioak tarteko. Urtarriletik ezin izan die partiduei jarraikortasun bat eman, eskuin besoan oinazeak izan baititu, tendinitis baten eraginez. Orain, ordea, errekuperatua dagoela azaldu du eta bere onena emateko prest dago Buruz Buruko Txapelketan: «Ez dut molestiarik eta azken entrenamenduetan ongi sentitu naiz. Lehengo urtean penetan geratu nintzen, ez nuelako nere onena eman eta aurten bai, nere onena emateko moduan izanen naiz. Gero, ez banaiz finalera iristen, pena izanen da, baina ez da gauza bera».
Goizuetarrak gaur ekinen dio txapelketari. Jokin Altunaren aurka jokatuko du kanporaketako lehenengo partidua. Iruñeako Labriten izanen da 16:45etatik aurrera.