Lehengo astean hasi zen Nafarroako Herriarteko Pilota Txapelketa eta Goizuetak ezin hobeto ekin dio txapelketari. Lau partidak irabazi zizkion Atarrabiako taldeari.
Kimu mailan, Joanes Apezetxea eta Beñat Apezetxeak 18-6 irabazi zieten Atarrabiako bikoteari. Infantiletan, Aitor Aizkorbe eta Antton Apezetxea 18-1 nagusitu ziren. Jubeniletan, Iker Salaberriak eta Jonni Salaberriak 22-8 hartu zituzten menpean Atarrabiako pilotariak. Eta seniorretan, Jon Zabaletak eta Ekaitza Narbartek 22-9 irabazi zuten.
Goizuetan jokatu zuten eta asteburu honetan, Barañainera joanen dira. Bihar neurtuko dituzte indarrak bertako pilotarien kontra, 10:00etatik aurrera. Hurrengoan berriz etxean ariko dira Esteribarren kontra.
Salaberriak finala, gaur
Iker Salaberriak Josetxo Ezkurra Torneoko finala jokatuko du gaur Donezteben (09:00), eskuz banaka, lau t’erdian. Lazkaoko Iraitz Zubizarreta izanen du aurrez aurre. Salaberria Berria Txapelketan ere ariko da, ostiralean, Erreka taldearekin. Hernanin jokatuko du.
Antton Apezetxea berriz, Urretxun ariko da (10:00), eskuz banaka, Ekain Etxeberriaren aurka (Oiartzun).