Lau urteren ondoren, aurten bukatuko ditu goi-mailako txistu ikasketak Jon Ansorena Mujika hernaniarrak, Euskal Herriko goi mailako musika ikastegian, Musikenen.
Ikasketak bukatzeko, ordea, errezitaldi bat eman beharko du epaimahai baten aurrean, ekainaren 8an. Horren aurretik, errezitaldi berezi hori primizian emango du gaur, 20:00etan Biterin, Hernani’n Musik ekimenaren barruan. Kontzertuak bi zati izango ditu: klasikoagoa aurrenekoa, eta garaikideagoa, bigarrena. Sarrerak bertan, salgai.
Maila goreneko musikariak
Txistua izango da gaurko protagonista, baina Musikeneko ikasle eta irakasleak ere izango ditu lagun Ansorenak: Maite Sagastibeltza (txistua), Maria Zubimendi (akordeoia), Gorka Katediano (perkusioa), Javier Perez de Azpeitia (pianoa), Alvaro Vallejo (biolina), Ainhoa Garayar (biolina), Ane Agirre (biola), Agate Amilibia (biolontxeloa) eta Oier Etxaburu (klabezina).