Ostiralean izango dute bere eguna, baserritarrek. San Isidro jaia ospatuko dute Astigarragan ere, eta egun osoko festa antolatu dute, bai herriko kaxkoan, eta baita Zamalbide-Bentak auzoan ere.
Kaxkoko jaia, Goldea herri kirol elkarteak antolatu du, Udalaren babesarekin. Foru Plaza izango da bilgunea, eta prozesioa eta meza egingo dituzte 10:00etan. Ondoren, Gure Izarra elkartera joango dira, hamaiketakoa egitera.
Idi dema eta bertsolariak, eguerdian
Goizean zehar, Astigarragako baserrien erakusketa izango da plazan bertan, eta eguerdian, idi demak eta bertsolariek hartuko dute protagonismoa: Orioko Oliden eta Bizkaiako Aurrekoetxea lehian, eta Andoni Egaña eta Sebastian Lizaso kantuan. Bazkari eder batekin borobilduko dute jaia, Gure Izarra elkartean.
Festa goiz eta arratsalde, Zamalbide-Bentak auzoan
Prozesioa eta mezarekin hasiko dira Zamalbide-Bentak auzoan ere, eta txupinazoaren ondotik, bertsolariak ariko dira kantuan. Gero, Auzolan elkartean egingo dute bazkaria (txartelak aurrez erosi behar ziren). Eta idi probekin bukatuko dute, arratsaldean: Retegi, Matxain eta Aburuza.
Larunbatean, haur eta gazteen eguna izango da, eta erretiratuen eguna igandean. Egitarau betearekin, biak ere.
KAXKOAN
10:00, Prozesioa, meza, eta ondoren hamaiketakoa Gure Izarra elkartean.
Goizean zehar, Astigarragako baserrietako barazkien erakusketa.
12:30, Idi demak: Orioko Oliden eta Bizkaiako Aurrekoetxearen idiak, 3.200 kiloko harriarekin.
Egunean zehar, Andoni Egaña eta Sebastian Lizaso bertsolariak.
14:30, Bazkaria eta baserritar zaharrei omenaldia, Gure Izarra elkartean.
ZAMALBIDE-BENTAK auzoan
11:45, Prozesioa elizaren inguruan, eta 12:00etan meza.
12:45, Txupinazoa eta salda hartzea eliz-atarian.
13:00, Bertsolariak.
14:00, Lagunarteko bazkaria Auzolan elkartean.
18:00, Idi probak: Retegi, Matxain eta Aburuza. Doan.
Maiatzak 16, Haur eta gazteen eguna: jolasak, puzgarriak, tailerrak, haur bazkaria, apar-festa, afari musikatua...
Maiatzak 17, Erretiratuen eguna: meza, bertsolariak, erretiratuen omenezko bazkaria...