Aurrez aurre jarriko dituzte Astigarragako alkategaiak, gaur. Debatea antolatu du Herrikoi auzo elkarteak, Kultur Etxean, arratsaldeko 19:30etan. Gonbita luzatu diete alkategai guztiei, mahai-inguruan parte hartzeko, eta horietako bik konfirmatu dute egongo direla: Andoni Gartzia EH Bilduren hautagaiak, eta Jesus Mari Santos EAJren alkategaiak.
Beste bi alkategaiek, Mikel Duranek (PSE-EE) eta Jacobo Caparrosek (PP), ez dute erantzun oraindik.
Bi ordu eta erdiko saioa egingo dute, eta herritarrek aukera izango dute zuzenean alkategaiei galdetzeko.
Galdera sorta prest, alkategaientzat
Bi ordu eta erdiko saioa prestatu dute, 19:30etatik 22:00etara, eta galdera sorta zabal bat osatu du auzo elkarteak, alkategaientzat. Politikari buruz, egoera ekonomikoaz, etxebizitzaren gaiaz, zerbitzuei buruz, uholdeei buruz, garraio publikoaz eta Udalaren kudeaketaz galdetuko diete.
Bertaratuek ere, aukera
Prestatutako galderak bukatuta, bertaratzen diren herritarrek ere izango dute aukera, alkategaiei galdetzeko: «Udal Hauteskundeak direla eta, garrantzitsua iruditzen zaigu herritarrek aukera hori izatea», azaldu dute antolatzaileek.
Alkategai bakoitzak denbora tarte jakin bat izango du, galdera bakoitzari erantzun ahal izateko.