Omenaldi moduan sortu dute erakusketa Azpiazu eta Azkueren lagunek. Koldo Azpiazu 2014an hil zen, eta Angel Azkue, berriz, 2009an. Bi hernaniar hauen pintura eta eskulturak ikusi daitezke Biterin, 18:00etatik 21:00etara, hilaren 20ra arte.
Oteizarekin eta bere kabuz sortutako obrak, Azpiazuk
Ainara Azpiazu, Koldo Azpiazuren iloba da, eta erakusketa osatzen laguntzen ari da. «Bere obra oso sakabanatua dago. Gainera, momentu batetik aurrera utzi egin zion sormen lanari. Beraz, erakusketa nahiko erretrospektiboa egiten saiatu gara; Arantzazun Oteizarekin egindako lanak, bere kabuz sortutakoak, Aldatzen bizi izan zenekoak...».
Erakusketak, osabaren obraren berri gehiago jakiteko ere balioko duela uste du Azpiazuk: «Koldok ibilbide zabala izan zuen, harreman asko eduki zituen eta oso emozionala zen. Lan asko oparitu egiten zituen. Espero dut jendea etorriko dela».
Azkue autodidaktaren 3 fase
Mari Karmen Urbialde, Angel Azkueren alargunak, bere ibilbideak izandako hiru fase bildu ditu erakusketan: «Pintura figuratiboarekin hasi zen. Guztiz autodidakta izan zen. Baina hark betetzen ez zuenean, 8 urtez margotu gabe egon zen. Orduan hasi zen hautsi eta abstrakziora jotzen; sortzeko beharra zeukan. Orduan, garai geometrikoan sartu zen, eta bukaeran, zinetikoan; bolumenak eta koloreak ederki erabiltzen zituen».
Urbialderen ustez, «Angel zen pertsona ona eta langilea; dena bihotzez egiten zuen».