Andoni Amonarraiz izango da EAJren hautagaia, Hernaniko alkatetzarako, datorren urteko Udal eta Foru hauteskundeetan. Azken bi legealdietan, EAJren bozeramaile izan da Hernaniko Udalean, eta 2003tik 2007ra, alkateorde izan zen. Urte horietan, Zerbitzu Publiko eta Gizarte Zerbitzuetako ardura izan zuen bere gain.
1958an jaio zen Amonarraiz, ezkonduta dago eta bi semeren aita da. Gaztetatik maite izan du herrigintza, eta EAJrekin egin zuen bat duela 24 urte. Hainbat ardura izan ditu ordutik: San Marko eta Añarbeko mankomunitateen kontseilari izan da, eta baita Hernaniko Industrialdekoa ere. 2012tik, Uri Buru Batzarreko presidentea da.
Ostalaritzarekin harreman estua
Enpresa eta Lan Arriskuen Prebentzioaren arloan, hainbat ikastaro egin zituen Amonarraizek, eta ostalaritzan hasi zen lanean. Zenbait jatetxetan egin zuen lan, eta jatetxe-sagardotegi bat ere zabaldu zuen. Eusko Jaurlaritzara eman zuen jauzia, ostalaritzaren inguruko arlo buru izateko. Gaur egun, kalitatezko bertako produktuak hedatzea helburu duen proiektu baten arduraduna da, eta GuztiONA Klusterreko kide ere bai.
Kirolzalea eta gertukoa
Politikagintzatik harago, kirola egitea du gustuko Amonarraizek (saskibaloia, eskubaloia, judoa...), eta familia eta adiskideekin egotea.