Hernaniko PSE-EE alderdiak, EH Bilduren legegintzaldiaren balantzea egin zuen ostegunean, prentsaurrean. Ricardo Crespo alkategaiak nabarmendu zuen EH Bilduk gehiengo absolutuarekin egindako gestioa ez dela egokia izan: «Herritarrei eragiten dieten gai garrantzitsuak inposatu egin dituzte, adostasunik bilatu gabe. Herritarren partehartzea nahi duten bezala ulertzen dute. Argi dago, gehiengo absolutuak, legitimoak izan arren, ez direla onak gizartearentzat».
Garapen Agentziarekin kritiko
Eskualdeko Garapen Agentziarekin oso kritiko azaldu zen Crespo: «Hasieratik eman genion Bilduri gure ikuspuntua tresna honen inguruan, guretzat hain garrantzitsua den gai batean laguntzeko tresna izanik; hau da, eskualdeko lan mundua bultzatzeko. Bilduren erantzuna izan zen beraiek bakarrik agentzia aurrera ateratzea, beraiek nahi zuten moduan».
«Trafikoko kaosarekin jarraitzen dugu»
Trafikoari dagokionez, orain dela lau urteko arazoekin eta beste berri batzuekin jarraitzen duela Hernanik salatu zuen: «Zirkulazio kaosarekin jarraitzen dugu eta kalean moldaketak egiten direnean, Bilduk ez die oposizioko alderdiei kontsultatzen ezta bizilagunei ere, inposaketaren politikari jarraituz».
Autobus zerbitzua ere hizketagai izan zuen: «Hernaniko sozialisten aspaldiko eskaria da autobus lineek beste ibilbide bat egin behar zutela herrian. Zerbitzua eman behar zaiela Florida, Etxeberri, Sagastialde, Sagastiya... auzoei. Hainbat urte eta gero, aldaketa batzuk egin dira, baina ez dira nahikoak. Hernaniko parte bati zerbitzurik eman gabe jarraitzen dugu».
Balantzearen inguruko liburuxka banatuko du PSE-EEk buzoietan.
«Hondakinen gaian, herritarrek erabakitzea nahi dugu»
Hondakinen gaiari helduz, galdeketa bat egin arte eta hernaniarrei hitza eman arte ez dela gaia itxiko azaldu zuen: «Aurreko asteko polemikak, hondakinen ordenantzaren moldaketarekin eta emergentzia punturen batean bideokamara jartzearekin izan genuenak argi erakusten du». Horren aurrean, hernaniarrek sistema guztiak ezagutzen dituztela azalduz, herritarrei hitza emateko eskatzen dute sozialistek, beraiek erabaki dezaten. «Aurreko legegintzaldian bildu ziren 6.000 sinadurak ere kontuan hartzeko eskatzen dugu», gaineratu zuen.
«Aurrekontuekin ere berdin jokatu dute»
EH Bilduren gobernatzeko moduaren beste adibide bat aurrekontuak direla azpimarratu zuen sozialisten alkategaiak: «Prozesua honakoa izan da: proiektua aurkeztu, zuzenketak egiteko epea ireki, eta beraien proiektua onartu. Ez dira saiatu ere egin oposizioa beraiengana gerturatzen, proiektua azalduz. Eta datozen urteetan berdina izango da, berriz gehiengo absolutua lortzen badute».
«Hainbat proiekturekin bat egin dugu sozialistok»
Dena ez dela negatiboa izan ere nabarmendu zuen Crespok: «Alderdi sozialistak Bilduren hainbat proposamen babestu ditu, positiboak iruditzen zitzaizkigulako. Adibidez, azken Plenoan babesa eman genion Udala %100 energia berdea sortzen duen kooperatibaren parte izateari. Eta Ongintzan aurrera eramaten diren gizarte politikak ere oso gutxitan kritikatzen ditu oposizioak».
Zentzu horretan, aurrekontu partehartzaileen ekimena ere begi onez ikusten dutela azaldu zuen: «Partidu guztiak egongo gara ekimen honetan eta lehenengo esperientzia izan da, joango gara hobetzen pixkanaka». Udaletxeko Harrera Zerbitzua ere positibotzat hartu dute, «aspalditik eskatzen ari ginena».
«Erabaki onak edo txarrak izan, inposaketan oinarritu dira»
Laburbilduz, Crespok adierazi zuen, erabakiak onak edo txarrak izan, inposaketan eta obsesioan oinarritutako legegintzaldia izan dela.
Kiroldegian egingo den obrari ere egin zion aipamena: «Prentsa bidez jakin dugu aurkezpena egin zela. Oposizioko kideoi ez digute ezer abisatu».
Balantzearen inguruan, kanpaina informatiboa
Balantzearen berri ematen duen liburuxka prestatu du PSE-EEk eta buzoietan banatuko du. 7.467 ale banatuko dituzte.