hirugarren urtez jarraian, Hernanik Herriarteko finala jokatuko du igandean, Atano IIIa pelotalekuan. Finalerdietako bueltako partidua jokatu zuen larunbatean Kiroldegiko pelotalekuan, eta 2-1 irabazi zuen, aurtengo faboritoaren kontra. Joaneko partidua kontuan izanda, Hernanik 5-1eko partzialarekin lortu du finalerako pasea. Igandean, Donostia taldea izango du aurrez aurre.
Egoitz eta Josu Altuna anaiak, gogor irabazi arte
Kadeteetan, Egoitz eta Josu Altuna anai bikiak izan ziren garaileak, Oiartzuni 22-19 irabazita. Zapirain eta Floresen kontra jokatu zuten, partitu gogor bezain emozionantea; ordubete inguruko iraupenekoa. Hernaniko bikotea aurretik izan zen markagailuan beti, eta tantu bikainak egin zituzten, konfiantza haundiarekin. Baina partidua gogortu egin zen, eta Oiartzungo bikoteak ez zuen azken momentura arte etsi. Azkenean, partidua, herniarrentzat izan zen, 22-19.
Jubeniletan partidu
berdindua, akats askokoa
Kadeteetako bikotearen garaipenarekin, jubenilak lasaiegi atera ziren kanporaketa jokatzera. Eneko Lujanbio eta Aritz Murgiondok 20-22 galdu zuten Sarasti eta Hernandezen kontra. Partidu berdindua izan zen, eta bi bikoteek akats asko egin zituzten. Azken txapan, tantu -errenka eginda, Oiartzun izan zen garaile.
Ojuel eta Gorrotxategi,
beste behin, jaun eta jabe
Azkeneko partiduan, seniorretakoan, bikote hernanirra jaun eta jabe izan zen beste behin. 22-5 irabazi zuten Martinez eta Irastorzaren kontra. Bikote hernaniarrak beste maila batean jokatzen du: Gorrotxategik partidua dominatu zuen; eta Ojuelek erremate ikusgarriak eskaini zituen.
Asteartetik aurrera,
finalerako sarrerak salgai
Final haundia Donostia taldearen kontra jokatuko du Hernanik, igandean, Atano IIIa pelotalekuan, 10:30etan. Finalerako sarrerak asteartik aurrera jarriko dituzte salgai Irizar tabernan. Sarrerak eskuratzeko, 18:00etatik 20:00etara pasa behar da, Irizar tabernatik.