Hernanik Gipuzkoako Herriarteko Txapelketako finala esku eskura dauka. Gaur, Oiartzuni partidu bakarra irabaztea nahikoa izango du; izan ere, joaneko kanporaketa 0-3 irabazi zion. Partiduak arratsaldeko 19:00etan hasiko dira, kiroldegiko pelotalekuan.
Ojuel, bueltan
Josu Oiaga entrenatzaileak aldaketa bat egingo du joan den asteburuko jokalarien artean. Senior mailan, Paul Ojuel aurrelaria itzuliko da Aitor Gorrotxategiren ondora. Aurreko asteburuan, ezin izan zuen jokatu eta bere ordez Ioritz Arrieta aritu zen. Kadeteetan, Egoitz eta Josu Altunak jokatuko dute eta jubeniletan, Eneko Lujanbio eta Aritz Murgiondok, txapelketa osoan bezala.
Helburua, sailkatzea
Taldearen helburua, partidu bat irabazi eta hirugarren aldiz jarraian, finalera sailkatzea da. Dena dela, Oiartzungo taldeak ezin badu aurreko asteburuan lesionatutako jokalariekin lehiatu, Hernanik gogor borrokatuko du hiru partiduak irabazteko.
Pelotazaleei animatzera
joateko, deia
Hernaniko pelota elkarteak dei egiten die herriko pelotazaleei gaur frontoira azaltzeko beraien indarra eta animoak ematera: «denon artean lortu dezakegu ekainaren 26an herriarteko laugarren txapela irabaztea, denboraldiko txapelketarik ezagunenetakoa dena». Hain zuzen, ekainaren 26an jokatuko da Herriarteko Txapelketako finala.