Probintzi mailako Plater Tiro Txapelketa jokatuko da gaur, Santa Barbara tiro zelaian. Parte hartuko dute Gipuzkoako ehiztari onenek, izan ere, Hernaniko Udala Sari Nagusia izango da jokoan eta diru sari ederrak banatuko dira irabazleen artean. Hobi unibertsala edo foso unibertsala modalitatean jokatuko da. Txapelketa goizeko 11:00etan hasiko da eta izen ematea ordu erdi lehenago zabalduko da. Egun guztiko tiraldia izango da eta 18:00ak arte egongo da aukera izena emateko. Txapelketa, Txantxangorri elkarteak antolatu du, San Joan Jaien barruan.
Gaur, Haurren Karabina Txapelketako kanporaketa
San Joan Jaien barruan, baita ere, Txantxangorri elkarteak Haurrentzako Karabina Txapelketa antolatu du, ohi bezala, Miguel Olloren omenez. Gaur, txapelketako kanporaketa jokatuko da, arratsaldeko 17:00etan, elkarteko lorategian.
Ehiza Txakur Lehiaketa eta
Uso tiro txapelketa, bihar
Bihar ere izango dute ehiztariek zerekin gozatua, Txantxangorri eta Hernaniko Udalaren eskutik. XXXIXgarren Ehiza Txakur Lehiaketa izango da. Lehiaketa, herri mailakoa eta probintzi mailakoa izango da eta Gipuzkoako ehiza txakur onenak izango dira bertan. Urnietako Xoxoka zelaian izango da, goizeko 09:00etatik aurrera. Parte hartu eta izena eman nahi dutenek, goizeko 08:30etatik 09:00etara izango dute aukera.
Horrez gain, bihar, Hernaniko Udala Sariko Uso Tiro Txapelketa jokatuko da, Colombaire erara, Jauregi baserriko zelaietan, 10:00etan.